ԼՈՌՈՒ ԵՎ ՇԻՐԱԿԻ ՄԱՐԶԵՐՈՒՄ ՄԱՐՏԻ 1-Ի ԴՐՈՒԹԵԱՄԲ ԱՆՕԹԵՒԱՆ Է 7
665 ԸՆՏԱՆԻՔ
10-03-2008 17:00:00 | Հայաստան | Հասարակութիւն
ԵՐԵՎԱՆ, 10 ՄԱՐՏԻ, ՆՈՅԵԱՆ ՏԱՊԱՆ: Լոռու եւ Շիրակի մարզերում
մարտի 1-ի դրութեամբ անօթեւան է 7 665 ընտանիք: Դրանցից 4 666-ը`
ՀՀ Շիրակի մարզում (այդ թւում` Գիւմրիում` 4018, մարզի 41
գիւղական համայնքներում` 648 ընտանիք): Ըստ ՀՀ Տարածքային
կառավարման նախարարութեան հասարակայնութեան հետ կապերի բաժնի
հաղորդագրութեան, այս մասին յայտարարուել է ՀՀ փոխվարչապետ,
տարածքային կառավարման նախարար Հովիկ Աբրահամեանի մօտ մարտի 10-ին
հրաւիրուած աշխատանքային խորհրդակցութեան ժամանակ:
1988-2008թթ.-ի ընթացքում Շիրակի մարզի քաղաքային եւ
գիւղական համայնքներում բնակարաններով ապահովել են 19 265
անօթեւան ընտանիքներ, այդ թւում 17 779-ը` Գիւմրիում: Բացի այդ,
Բնակարանների գնման ծրագրով (ԲԳՎ) 2005-2007թթ.-ին Գիւմրիում
բնակարաններ է ստացել 520 շահառու ընտանիք, մարզի գիւղական
բնակավայրերում կառուցուել է 112 բնակելի տուն: Բնակարանային
ապահովման ծրագրեր են իրականացուել նաեւ հասարակական կառոյցների
կողմից: Մասնաւորապէս, «Ուրբան» հիմնադրամի միջոցներով
2000-2004թթ.-ին մարզում բնակարան է ձեռք բերել 4 838 ընտանիք:
Լոռու մարզում 2008թ.-ի մարտի 1-ի դրութեամբ հաշուառուել է 2
999 անօթեւան ընտանիք, որից 114-ը` Վանաձոր, 923-ը` Սպիտակ, 59-ը`
Ստեփանաւան քաղաքներում: Մարզի 33 գիւղերում անօթեւան է 1 903
ընտանիք: 1988-2008թթ.-ի ընթացքում մարզում բնակարանով ապահովել է
14 601 անօթեւան ընտանիք, որից 11083 ընտանիք Վանաձոր, Սպիտակ,
Ստեփանաւան քաղաքներում, 3 518-ը` գիւղերում: Ինչպէս Շիրակի
մարզում, Լոռիում նույնպես իրականացուել են բնակարանային ապահովման
ծրագրեր. 2005-2007թթ.-ին Լոռու մարզում ԲԳՎ ծրագրով բնակարան է
ստացել 179 ընտանիք, իսկ գիւղերում 432 ընտանիքի համար կառուցուել
են բնակելի տներ: