ՀԱՅԱՍՏԱՆԻ ԼԱՎԱԳՈՒՅՆ ՆՇԱՆԱՌՈՒ ՆՈՐԱՅՐ ԲԱԽՏԱՄՅԱՆԸ ՇԱՐՈՒՆԱԿՈՒՄ
Է ՕԼԻՄՊԻԱԿԱՆ ԽԱՂԵՐԻ ՆԱԽԱՊԱՏՐԱՍՏՈՒԹՅՈՒՆԸ
30-05-2008 15:30:00 | Հայաստան | Սպորտ
ԵՐԵՎԱՆ, 30 ՄԱՅԻՍԻ, ՆՈՅՅԱՆ ՏԱՊԱՆ: Միլանում եւ Մյունխենում
իրար հաջորդեցին հրաձգության աշխարհի գավաթի խաղարկության փուլերը:
Հայաստանի լավագույն նշանառու Նորայր Բախտամյանը Իտալիայում 10մ
մրցատարածությունում գրավեց 14-րդ (580 միավոր), իսկ 50 մետրում`
20-րդ տեղը (559 միավոր): Գերմանիայի մրցաշարում նա ցույց տվեց
համապատասխանաբար 10-րդ (583) եւ 22-րդ (560 միավոր) արդյունքները:
Բարսելոնի օլիմպիական խաղերի չեմպիոն ՀՀ հրաձգության ֆեդերացիայի
նախագահ Հրաչյա Պետիկյանը «ՆՈՅՅԱՆ ՏԱՊԱՆ»-ի թղթակցին ասաց, որ
արդյունքից չի դժգոհում, քանզի նախաօլիմպիական մրցաշարերը
Բախտամյանի համար նախապատրաստական բնույթ են կրում: «Ամեն բան
ընթանում է նախապես մշակված ծրագրի համապատասխան: Փորձարկվում,
ճշգրտվում են մասնագիտական նուրբ տարրեր: Կարծում եմ, որ
Բախտամյանը Պեկինի խաղերում ավելի բարձր միավորներ կվաստակի»,-
ասաց Պետիկյանը: