ՀԱՅԱՍՏԱՆՈՒՄ ԱՅՍ ՏԱՐԻ ԵՎՍ ԿԱՆՑԿԱՑՎԵՆ ՄԻ ՇԱՐՔ ՄԻԱՋԱԶԳԱՅԻՆ
ՓԱՌԱՏՈՆԵՐ
14-03-2008 15:38:00 | Հայաստան | Մշակույթ
ԵՐԵՎԱՆ, 14 ՄԱՐՏԻ, ՆՈՅՅԱՆ ՏԱՊԱՆ: Ինչպես նախորդ տարիներին,
այնպես էլ այս տարի ՀՀ Մշակույթի նախարարության նախաձեռնությամբ
Հայաստանում կանցակացվեն մի շարք միջազգային փառատոներ:
Նախարարության հասարակայնության հետ կապերի բաժնի պետ Գայանե
Դուրգարյանը «ՆՈՅՅԱՆ ՏԱՊԱՆ»-ի թղթակցին հայտնեց, որ ավանդույթի
համաձայն աշնանը կկազմակերպվեն «Արմմոնո», «Հայֆեստ» թատերական
փառատոները: Բացի դրանից, Ծաղկաձորում կանցկացվեն մնջախաղի, իսկ
Դսեղում` «Թումանյանական հեքիաթի օր» տիկնիկային թատրոնների
միջազգային փառատոները:
Ըստ Գ.Դուրգարյանի, կկազմակերպվի նաեւ իտալական ֆիլմերի
փառատոն: Դասական երաժշտության սիրահարների համար Երեւանում
կանցկացվեն «Ազգային պատկերասրահ» եւ «21-ի հեռանկարներ»
փառատոները, որոնց կմասնակցեն աշխարհահռչակ հայ եւ օտարազգի
երաժիշտներ: Նրա խոսքերով, այս տարի կկազմակերպվի նաեւ Առնո
Բաբաջանյանի երգերի փառատոն:
Նշվեց նաեւ, որ Հայաստանի տարբեր խմբեր իրենց հերթին
կմասնակցեն արտերկրում անցկացվող միջազգային փառատոների:
Մասնավորապես, Ստրասբուրգում կայանալիք «Ռոմանական ձայներ եւ
ճանապարհ» փառատոնի շրջանակներում համերգով հանդես կգա Սբ. Գեղարդ
վանքի երգչախումբը: