ՍԻԴՆԵՅ, 13 ՓԵՏՐՎԱՐԻ, ՆՈՅՅԱՆ ՏԱՊԱՆ: Ավստրալիայի վարչապետ Քեւին Ռադդը ներողամտություն է հայցել երկրի բնիկ բնակչությունից «մեծագույն աղետների եւ վիրավորանքների» համար, որ պատճառվել է անցած տարիների քաղաքականության ընթացքում: Այս հայտարարությամբ նա հանդես է եկել խորհրդարանի նիստում: Տեղի աբորիգեններին, որպես «այսօր գոյություն ունեցող քաղաքակրթություններից ամենահնին», ուղղված իր խոսքում Ռադդը խոստովանել է, որ նրանց մի ամբողջ սերնդի պատճառվել է «խոր ցավ, տառապանքներ եւ կորուստներ»: «Նախ եւ առաջ, մենք հաշվարկում ենք, որ մարդիկ ոչ միայն կկարողանան ապաքինել իրենց հոգեկան վերքերը, այլեւ առաջ շարժվել լուծելով խնդիրները, որոնք մինչեւ հիմա հետապնդում են աբորիգեններին»,- ընդգծել է Ռադդը: Նախարարների կաբինետի ղեկավարը ցանկություն է հայտնել մայրցամաքի բնիկ բնակչությանը դարձնելու ավստրալական հասարակության իրավահավասար անդամներ եւ նրանց դուրս բերելու «մեկուսացածության վիճակից»: Իր խոսքում Ռադդը նշել է, որ «այսօրվա դրությամբ «սպիտակ» եւ «սեւ» բնակչության միջեւ փոխհարաբերությունների խնդրի լուծումը կառավարության առաջնահերթ խնդիրն է, որը բոլոր ջանքերը կգործադրի խաղաղության եւ քաղաքացիական համաձայնության հասնելու համար»:

---