ՀԱՅԱՍՏԱՆՈՒՄ ԱՖՐԻԿՅԱՆ ԺԱՆՏԱԽՏԻ ՀԵՏԵՎԱՆՔՈՎ ՍՊԱՆԴԻ ԵՆԹԱՐԿՎԱԾ
ԽՈԶԵՐԻ ՏԵՐԵՐԻՆ ԿՏՐՎԻ ԴՐԱՄԱԿԱՆ ՕԳՆՈՒԹՅՈՒՆ
07-02-2008 22:40:00 | Հայաստան | Տնտեսություն
ԵՐԵՎԱՆ, 7 ՓԵՏՐՎԱՐԻ, ՆՈՅՅԱՆ ՏԱՊԱՆ: ՀՀ կառավարությունը այս
տարի իր պահուստային ֆոնդից 479 մլն 548 հազար դրամ կհատկացնի
Գյուղատնտեսության նախարարությանը` հանրապետությունում 2007թ.-ին
արձանագրված խոզերի աֆրիկյան ժանտախտ հիվանդության հետեւանքով
18800 անկած եւ հարկադիր սպանդի ենթարկված կենդանիների
սեփականատերերին օժանդակություն ցույց տալու նպատակով: Նման
որոշում կայացվել է կառավարության փետրվարի 7-ի նիստում:
Ինչպես նիստից հետո նշեց նախարարության Սննդի անվտանգության
եւ անասնաբուծության տեսչության պետ Գրիշա Բաղիյանը, կենդանիների
մաքուր մսի 1 կգ-ի դիմաց օժանդակության գումարի չափը սահմանվել է
1005 դրամ (մոտ 3,3 ԱՄՆ դոլար): Որոշմամբ հատկացված միջոցները
կտրամադրվեն բանկերի միջոցով: Ի դեպ, ըստ Գ.Բաղիյանի,
հանրապետությունում կա 152 հազար գլուխ խոզ:
Գ.Բաղիյանը տեղեկացրեց, որ հարեւան Թուրքիայում վերջերս
հայտնաբերված թչնագրիպի դեպքերի կապակցությամբ հանրապետությունում
իրականացվում են համապատասխան կանխարգելիչ միջոցառումներ, այդ
թվում խիստ վերահսկողություն է սահմանվել հայ-թուրքական սահմանին: