ԱՐՄԵՆԱԿ ԽԱՉԱՏՐՅԱՆ. ՀԱՅԱՍՏԱՆՈՒՄ ՄՇԱԿՈՒԹԱՅԻՆ ԱՐԺԵՔՆԵՐԻ
ՊԱՀՊԱՆՈՒԹՅՈՒՆԸ ՀԱՄԱՀՈՒՆՉ Է ԵՐԿՐԻ ՆԵՐԿԱ ՎԻՃԱԿԻՆ
04-02-2008 17:00:00 | Հայաստան | Մշակույթ
ԵՐԵՎԱՆ, 4 ՓԵՏՐՎԱՐԻ, ՆՈՅՅԱՆ ՏԱՊԱՆ: Հայաստանում մշակութային
արժեքների պահպանության վիճակը համահունչ է երկրի ներկա վիճակին:
Այսպես բնութագրեց իր պատասխանատվության ոլորտը ՀՀ մշակույթի
նախարարության մշակութային արժեքների պահպանության գործակալության
պետի տեղակալ Արմենակ Խաչատրյանը փետրվարի 4-ին «Ուրբաթ»
ակումբում:
Նրա խոսքերով, մշակութային արժեքների պահպանության խնդիրները
«պահպանողական» բնույթ ունեն: «Տարիներ շարունակ այդ ոլորտի
մասնագետները, որոնք նվիրյալներ են, փորձել են հնարավորինս
ապահովել երկրից ժամանակավոր արտահանվող յուրաքանչյուր արժեքավոր
նմուշի վերադարձը»: Ներկայումս Հայաստանի պետական 67 պահոցներում
պահպանվում են 6 մլն շարժական մշակութային արժեքներ` նկարներ,
քանդակներ, կիրառական արվեստի նմուշներ, լուսանկարներ, գրքեր եւ
այլն:
Խաչատրյանի գնահատմամբ, 2004 թվականին ընդունված «Մշակութային
արժեքների արտահանման եւ ներմուծման մասին» ՀՀ օրենքը 1994 թ.
համեմատ շատ ազատականցված է: Նախկին օրենքը շատ կոշտ էր, ուներ
բազում թերություններ, «խոչընդոտում էր քաղաքացիների
գործողություններին»: Ներկայումս անհատ քաղաքցիները կարող են
երկրից դուրս տանել իրենց պատկանող մինչեւ 50 տարվա հնության
ցանկացած արժեք, եթե այն ստորագրված է հեղինակի կողմից:
Ա.Խաչատրյանը այս ոլորտում առկա ամենակարեւոր խնդիրը համարեց
փորձագետների եւ փորձագիտական լաբորատորիաների պակասը: «Ներկայումս
փորձագիտական քննությունը կատարվում է միայն վիզուալ զննման
եղանակով»,- ընդգծեց նա:
Ա.Խաչատրյանը հայտնեց, որ իր պաշտոնավարման տարիներին չի
գրանցվել դեպք երբ ժամանակավորապես արտահանված մշակութային
արժեքները չվերադարձվեն: Նա տեղեկացրեց, որ Հայաստանից չի կարելի
արտահանել 19 շարժական ցուցանմուշ, որոնք ընդգրկված են հատուկ
պահպանվող ցուցանմուշների ցանկում. դրանցից 3-ը գտնվում են
Հայաստանի պատմության թանգարանում եւ 16` Մատենադրանում: