ՊԱԿԻՍՏԱՆՈՒՄ ՁԵՐԲԱԿԱԼՎԵԼ ԵՆ ԸՆԴԴԻՄՈՒԹՅԱՆ 500 ԿՈՂՄՆԱԿԻՑՆԵՐ ԵՎ
350 ԴԱՏԱՎՈՐՆԵՐ
05-11-2007 18:06:00 | | Միջազգային
ԻՍԼԱՄԱԲԱԴ, 5 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Պակիստանի
իշխանությունները ձերբակալել են ընդդիմադիր քաղաքական գործիչների`
«Ջամաաթ-ի-իսլամի» իսլամական կուսակցության 500 կողմնակիցների: Այս
մասին նոյեմբերի 5-ին տեղեկացրել է բրիտանական «Սքայ»
հեռուստաալիքը վկայակոչելով այդ կուսակցության ներկայացուցիչների:
Հաղորդվում է, որ տվյալ քաղաքական ուժը դեռ ավելի վաղ պնդում էր,
որ Փերվեզ Մուշարրաֆի կողմից նախագահի եւ զինված ուժերի գլխավոր
հրամանատարի պաշտոնների համատեղումը սահմանադրական չէ:
«Սքայը» նաեւ հաղորդում է, որ ազգային դատական համակարգի
աշխատողների կազմակերպած բողոքի ցույցի մասնակիցների հետ
պակիստանյան ոստիկանների բախումների արդյունքում կալանավորվել են
առնվազն 350 դատավորներ: Հաղորդվում է, որ ամենախոշոր ակցիան
անցկացվել է Լահորում, որտեղ Գերագույն դատարանի շենքում են
հավաքվել մոտ 2 հազար դատավորներ: Իշխանությունները ցրել են բողոքի
այդ հանրահավաքը գործի դնելով մահակներ եւ արցունքաբեր գազ: Ինչպես
հավաստվում է, դատավորների ձերբակալությունները կապված են այն բանի
հետ, որ նրանք հրաժարվել են նախագահ Մուշարրաֆին հավատարմության
նոր երդում տալ: