ԱՄԵՆԱՇԱՏ ՄԱՀԱՊԱՏԻԺՆԵՐԸ 2006 ԹՎԱԿԱՆԻՆ ԻՐԱԿԱՆԱՑՎԵԼ ԵՆ
ՉԻՆԱՍՏԱՆՈՒՄ, ԻՐԱՆՈՒՄ ԵՎ ՊԱԿԻՍՏԱՆՈՒՄ
29-10-2007 16:28:00 | ԱՄՆ | Միջազգային
ՆՅՈՒ ՅՈՐՔ, 29 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Չինաստանը, Իրանը եւ
Պակիստանը, ըստ ՄԱԿ-ի տվյալների, գլխավորում են այն պետությունների
«սեւ» ցուցակը, որոնք մյուսներից ավելի շատ մահապատիժներ են
իրականացրել 2006 թվականին:
«51 պետություններից, որտեղ չեն վերացրել մահապատիժը, 40-ում
իշխանության գլուխ են կանգնած բռնապետական, ավտորիտար
վարչակարգեր»,- ասվում է զեկույցում, որը հոկտեմբերի 29-ին
կներկայացվի ՄԱԿ-ի կենտրոնակայանում:
Չինաստանում իրագործվել է հինգ հազարից ավելի մահապատիժ, որը
կազմում է անցած տարի աշխարհում իրականացված բոլոր մահավճիռների
98,8%-ը: Որոշ փորձագիտական գնահատումներով, որ նույնպես ներառված
են զեկույցում, մահապատժի ենթարկվածների չինական ցուցակը իրականում
կարող է հասնել ութ հազար մարդու:
«Չինաստանը մահավճիռների թվով արդի պատմության մեջ
չգերազանցված պետություն է»,- նշվում է զեկույցում:
Իրանը իրականացված մահապատիժների թվով զբաղեցնում է երկրորդ
տեղը. 2006 թվականին այստեղ կախաղան է բարձրացվել նվազագույնը 215
մարդ, այդ թվում յոթ անչափահասներ, ինչը երեխաների իրավունքների
միջազգային կոնվենցիայի խախտում է:
ՄԱԿ-ի զեկույցի հեղինակները նշում են, որ չնայած ձեւական
առումով մահապատժի ենթարկվածները մեծամասամբ մեղադրվել են
թմրադեղերի տարածման հետ կապված հանցագործությունների մեջ, նրանցից
շատերը պատկանել են կառավարության ընդդիմախոսների թվին:
Պակիստանում մահապատժի ենթարկվածների թիվը անցած տարի կազմել
է 82 մարդ: