ԲՐՅՈՒՍԵԼ, 25 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Եվրոհանձնաժողովը
առաջարկել է մի օրինագիծ, որ խոստանում է գրավել «օգտակար
ներգաղթողների»: Մասնագետներին կդիմավորեն գրկաբաց եւ նրանց
կհանձնեն «ԵՄ կապույտ քարտ»: Ինչպես բացատրում են
եվրոպաշտոնյաները, դա մի տեսակ ամերիկյան «գրին-քարտ» է, միայն թե
ավելի լավը: Բրյուսելյան փորձագետները եվրոպական երկրների
քաղաքացիներին համոզում են, որ առանց արտասահմանից բանվորական
ձեռքերի եւ խելոք գլուխների ներհոսի անհնար է պահպանել այսօրվա
ծերունիների ստեղծած հարստությունը:
Եվրոհանձնաժողովի նախագահի տեղակալ Ֆրանկո Ֆրատտինին ներգաղթի
մասին նոր օրինագծի քննարկումից հետո խորհուրդ է տվել. «Եթե նայենք
թվերին, ապա Եվրոպայի գրավչությունն այնքան էլ բարձր չէ: Մենք
տարեկան ընդունում ենք 70 հազար որակյալ մասնագետների: Այնքան էլ
մեծ բան չէ»:
«Կապույտ քարտը», որն առաջարկում է Եվրոհանձնաժողովը, եւ'
բնակության իրավունքի մի տեսակ է, եւ' երկու տարի աշխատելու
թույլտվություն` երկարացման հնարավորությամբ: Այն ստանալու համար
աշխատողին հարկավոր է ունենալ առնվազն երեք տարվա աշխատանքային
ստաժ, նրա աշխատատեղին չպետք է հավակնեն ԵՄ քաղաքացիներ: «Կապույտ
քարտը» կլինի միասնական ողջ ԵՄ-ի համար, եթե, անշուշտ, այդ օրենքն
ընդունվի: