ՀԱՅԱՍՏԱՆԻ ԱՌՈՂՋԱՊԱՀԱԿԱՆ ՀԱՄԱԿԱՐԳՈՒՄ ԱՃԵԼ ԵՆ ՊԵՏԱԿԱՆ
ԱՂԲՅՈՒՐՆԵՐԻ ԾԱԽՍԵՐԸ
19-10-2007 19:50:00 | Հայաստան | Հասարակություն
ԵՐԵՎԱՆ, 19 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Առաջին անգամ
Հայաստանում կազմվել է 2004-2006թթ.-ների Ազգային առողջապահական
հաշիվների (ԱԱՀ) զեկույց: Ինչպես զեկույցի հոկտեմբերի 19-ի
ներկայացմանը նշեց ՀՀ Պետական առողջապահության գործակալության
տնօրեն Արա Տեր-Գրիգորյանը, ԱԱՀ-ի համաձայն, ՀՀ առողջապահության
համակարգում 2006թ.-ին ընդհանուր առողջապահական ծախսերը կազմել են
ավելի քան 12,4 մլն դրամ 2005թ.-ի 12,1 մլն դրամի դիմաց: Ըստ նրա
2005-2006թթ.-ներին ՀՀ առողջապահության համակարգի ֆինասավորման
ծավալները հիմանակում բաժին են ընկել պետական աղբյուրներին:
2006թ.-ին մեկ շնչի հաշվով համակարգում կատարված ծախսումների
ծավալները կազմել են 38 597 (մոտ 113 ԱՄՆ դոլար), դրամ, 2004թ.-ի
33 925 դրամի դիմաց (աճը` 14 %): Պետական աղյուրներից
ֆինանսավորումը մեկ շնչի հաշվով 2006թ.-ին կազմել է 13090 դրամ,
2004թ.-ի 8278 դրամի դիմաց (աճը` 58%): Մասնավոր աղբյուրներից
կատարված ֆինանսավորումը 2006թ.-ին կազմել է 19 921 դրամ, 2004թ.-ի
23 362 դրամի դիմաց (նվազել է 17 %-ով): Մեկ շնչի հաշվով արտաքին
դոնորների կողմից կատարված ծախսումների ծավալները 2006թ.-ին կազմել
է 5586 դրամ, 2004թ.-ի 2285 դրամի դիմաց:
Ա.Տեր-Գրիգորյանի խոսքերով, ընդհանուր առողջապահական
ծախսերում զգալի աճել են պետական աղբյուրների ծախսերը: Նա փաստեց,
որ պետական աղբյուրների եւ արտաքին դոնորների կողմից կատարված
ծախսումների ավելացմանը զուգահեռ նվազել են մասնավոր աղբյուրների
կողմից առողջապահության համակարգում կատարված ծախսումների
ծավալները: