ՓԱՐԻԶ, 24 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սեպտեմբերի 22-ին 84
տարեկան հասակում մահացել է ֆրանսիացի դերասան, աշխարհահռչակ
մնջախաղաց Մարսել Մարսոն: Այս մասին սեպտեմբերի 23-ին հաղորդել են
դերասանի հարազատները:
Մարսել Մարսոն ծնվել է 1923թ. մարտի 22-ին Ստրասբուրգում:
2-րդ աշխարհամարտի տարիներին մասնակցել է Հակաֆաշիստական
դիմադրություն շարժմանը: Եղել է Ֆրանսիայի գեղեցիկ արվեստների
ակադեմիայի անդամ: Արժանացել է Պատվո լեգիոնի շքանշանի:
1947թ. Մարսել Մարսոն ստեղծում է Բիպի` թունդ սպիտակեցրած
դեմքով, զոլավոր շապիկով եւ ճմռթված գլանագլխարկով ծաղրածուի
կերպարը, իսկ 1949թ.` իր թատրոնը, որն այն ժամանակ մնջախաղի միակ
թատրոնն էր աշխարհում: 1978թ. Փարիզում հիմնել է Մնջախաղի
միջազգային դպրոց:
«Ես վստահ եմ` կարելի է երիտասարդ լինել ու ծերունու սիրտ
ունենալ: Եվ ընդհակառակը` տարեց մարդու սրտի տակ կարող է լիովին
ջահել սիրտ տրոփել: Կյանքը հիասքանչ է, եթե նույնիսկ ծանր է»,-
ասում էր Մարսել Մարսոն:
Մարսել Մարսոյի հուղարկավորությունը տեղի կունենա Պեր Լաշեզ
գերեզմանատանը: