ՖՐԱՆՍԻԱՆ ՊԵՏՔ Է ՊԱՏՐԱՍՏՎԻ ԻՐԱՆԻ ՀԵՏ ՊԱՏԵՐԱԶՄԻ,- ՀԱՅՏԱՐԱՐՈՒՄ
Է ՖՐԱՆՍԻԱՅԻ ԱԳՆ ՂԵԿԱՎԱՐ ԲԵՌՆԱՐ ՔՈՒՇՆԵՐԸ
17-09-2007 14:26:00 | Ֆրանսիա | Միջազգային
ՓԱՐԻԶ, 17 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Ֆրանսիան պետք է
պատրաստվի Իրանի հետ պատերազմի: Այս մասին հեռուստահարցազրույցի
ժամանակ հայտարարել է Ֆրանսիայի արտգործնախարար Բեռնար Քուշները:
Ըստ նրա, իրանական ատոմային ճգնաժամը ամենալուրջ խնդիրներից
մեկն է աշխարհում, եւ համաշխարհային հանրությունը չպետք է թույլ
տա, որպեսզի Թեհրանի ձեռքը ատոմային ռումբ ընկնի: Քուշները ընդգծել
է, որ առաջին հերթին անհրաժեշտ է օետագործել դիվանագիտական բոլոր
հնարավոր միջոցները, առավելագույն ճնշում գործադրել Իրանի վրա,
սահմանել տնտեսական լուրջ պատժամիջոցներ, բայց այնպես, որպեսզի
դրանք վերաբերեն կառավարող վերնախավին եւ գործարարներին, այլ ոչ թե
հասարակ իրանցիներին: ԱԳՆ ղեկավարը նշել է, որ ֆրանսիական որոշ
ընկերությունների արդեն խորհուրդ է տրվել պայմանագրեր չկնքել
իրանական ֆիրմաների հետ:
«Մենք խնդրել ենք որոշակի թվով ընկերությունների չմասնակցել
իրանական հայտամրցույթներին: Դա ազդանշան է, որ մեր
մտադրությունները շատ լուրջ են»,- նշել է Ֆրանսիայի արտաքին
գերատեսչության ղեկավարը:
Ինչպես նշում են Ֆրանսիայի ԱԳՆ ներկայացուցիչները, իրանյան
հարցը առանցքային թեմաներից է լինելու Ռուսաստանում Բեռնար
Քուշների այցի ժամանակ, որը սկսվում է սեպտեմբերի 17-ին:
Մասնավորապես, նրանց կարծիքով, իր ռուս գործընկեր Սերգեյ Լավրովի
հետ Քուշների հանդիպմանը կշոշափվի ՄԱԿ-ի կողմից Իրանի վերաբերյալ
նոր բանաձեւի ընդունման հարցը: