ԵՐԵՎԱՆ, 12 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սեպտեմբերի 12-ին
Հայաստանի եւ Ռուսաստանի գրողների միությունների միջեւ ստորագրվեց
բարեկամության, համագործակցության եւ փոխօգնության գործող
պայմանագիրն ամրապնդող փաստաթուղթ: Այս արարողությամբ պաշտոնապես
բացվեցին «Ռուսական խոսքի օրերը» Հայաստանում:
ՀԳՄ նախագահ Լեւոն Անանյանը նշեց, որ, պայմանագիրը գործում է
շուրջ 10 տարի, եւ այդ տարիների ընթացքում բավականին մեծ աշխատանք
է տարվել, մասնավորապես, ռուսական եւ հայկական բազմաժանր
ստեղծագործությունները թարգմանելու ուղղությամբ:
«Բարեկամության եւ համագործակցության ռուսական ընկերությունն
ամեն կերպ նպաստում է երկու երկրների միջեւ գրական, տեղեկատվական
փոխանակումների վերականգնմանը: Այդ նպատակով այստեղ ենք բերել մի
շարք գրքեր, որոնք կապացուցեն, որ մեր երկրներում գրականությունը
եւ պոեզիան ապագա ունեն: Գրականության միջոցով է, որ հատկապես սերտ
կապեր պիտի ունենանք միմյանց հետ»,- ընդգծեց ռուսական
պատվիրակության ղեկավար, Հայաստանի հետ բարեկամության եւ
համագործակցության ռուսական ընկերության նախագահ Վիկտոր
Կրիվոպուսկովը:
ՌԴ գրողների միության քարտուղար Նիկոլայ Պերեյասլովն ասաց, որ
հայ եւ ռուս գրողների հանդիպումները թեեւ հաճախ չեն լինում, սակայն
սովորաբար արգասաբեր են: Նրա խոսքով, ռուս եւ հայ ժողովուրդների
միջեւ գրական շփումները հնարավոր են դառնում անկեղծ ու փոխշահավետ
համագործակցության շնորհիվ:
Մինչեւ սեպտեմբերի 17-ը կանցկացվեն բազմաբնույթ մշակութային
միջոցառումներ` նվիրված ռուսաց լեզվին, Հայաստանի եւ Ռուսաստանի
միջեւ գրական, տեղեկատվական կապերի ամրապնդմանը: «Ռուսական խոսքի
օրերը» կազմակերպել է Հայաստանի հետ բարեկամության եւ
համագործակցության ռուսաստանյան ընկերությունը: