ՀԱՅԱՍՏԱՆԻ ՏՆՏԵՍՈՒԹՅՈՒՆԸ ՈՉ ԲՆԱԿԱՆՈՆ Է ԶԱՐԳԱՆՈՒՄ,- ԳՏՆՈՒՄ Է
ՏՆՏԵՍԱԳԵՏ ԷԴՈՒԱՐԴ ԱՂԱՋԱՆՈՎԸ
30-08-2007 22:00:00 | Հայաստան | Տնտեսություն
ԵՐԵՎԱՆ, 30 ՕԳՈՍՏՈՍԻ, ՆՈՅՅԱՆ ՏԱՊԱՆ: 2007թ.-ի առաջին
կիսամյակում ՀՀ արտաքին առեւտրի պակասուրդը կազմել է 838 մլն
դոլար` 2006թ.-ի նույն ժամանակահատվածի 511 մլն դոլարի դիմաց:
Արտաքին առեւտրի պակասուրդի հարաբերակցությունը ՀՆԱ-ի նկատմամբ
կազմել է 31,7%, ինչը վկայում է երկրի տնտեսության ոչ բնականոն
զարգացման մասին: Այս մասին օգոստսոսի 30-ի քննարկման ժամանակ
հայտարարեց տնտեսագետ, ՀՀ վիճակագրական գերատեսչության նախկին
ղեկավար Էդուարդ Աղաջանովը:
Ըստ նրա, եթե ԱՄՆ-ում տագնապահարույց են համարում այն
հանգամանքը, որ այդ երկրում արտաքին առեւտրի պակասուրդ/ՀՆԱ
հարաբերակցությունը հասել է 6-7%-ի, ապա Հայաստանի
իշխանությունները քննարկման առարկա չեն դարձնում այդ
հարաբերակցության բարձր ցուցանիշը նվազեցնելու հարցը:
Նշվեց, որ պատկան գերատեսչությունների շատ ղեկավարներ
անտեղյակ են Հայաստանի տնտեսական զարգացումներից` հարցազրույցների
ժամանակ ներկայացնելով պաշտոնական վիճակագրության ցուցանիշներից
զգալիորեն տարբերվող տվյալներ:
Է.Աղաջանովի խոսքերով, Հայաստանում տեղի է ունենում մշակող
արդյունաբերության հզորությունների կրճատման գործընթաց, քանի որ
ավանդական արդյունաբերական շատ ապրանքների ներմուծումն ավելի
ձեռնտու է դարձել, քան տեղում արտադրելը: