ՀԱՅԱՍՏԱՆԻ ՏՆՏԵՍՈՒԹԻՒՆԸ ՈՉ ԲՆԱԿԱՆՈՆ Է ԶԱՐԳԱՆՈՒՄ,- ԳՏՆՈՒՄ Է
ՏՆՏԵՍԱԳԷՏ ԷԴՈՒԱՐԴ ԱՂԱՋԱՆՈՎԸ
30-08-2007 22:00:00 | Հայաստան | Տնտեսութիւն
ԵՐԵՎԱՆ, 30 ՕԳՈՍՏՈՍԻ, ՆՈՅԵԱՆ ՏԱՊԱՆ: 2007թ.-ի առաջին
կիսամեակում ՀՀ արտաքին առեւտրի պակասուրդը կազմել է 838 մլն
դոլար` 2006թ.-ի նոյն ժամանակահատուածի 511 մլն դոլարի դիմաց:
Արտաքին առեւտրի պակասուրդի յարաբերակցութիւնը ՀՆԱ-ի նկատմամբ
կազմել է 31,7%, ինչը վկայում է երկրի տնտեսութեան ոչ բնականոն
զարգացման մասին: Այս մասին օգոստսոսի 30-ի քննարկման ժամանակ
յայտարարեց տնտեսագէտ, ՀՀ վիճակագրական գերատեսչութեան նախկին
ղեկավար Էդուարդ Աղաջանովը:
Ըստ նրա, եթէ ԱՄՆ-ում տագնապահարոյց են համարում այն
հանգամանքը, որ այդ երկրում արտաքին առեւտրի պակասուրդ/ՀՆԱ
յարաբերակցութիւնը հասել է 6-7%-ի, ապա Հայաստանի
իշխանութիւնները քննարկման առարկայ չեն դարձնում այդ
յարաբերակցութեան բարձր ցուցանիշը նուազեցնելու հարցը:
Նշուեց, որ պատկան գերատեսչութիւնների շատ ղեկավարներ
անտեղեակ են Հայաստանի տնտեսական զարգացումներից` հարցազրոյցների
ժամանակ ներկայացնելով պաշտօնական վիճակագրութեան ցուցանիշներից
զգալիօրէն տարբերուող տվյալներ:
Է.Աղաջանովի խօսքերով, Հայաստանում տեղի է ունենում մշակող
արդիւնաբերութեան հզորութիւնների կրճատման գործընթաց, քանի որ
աւանդական արդիւնաբերական շատ ապրանքների ներմուծումն աւելի
ձեռնտու է դարձել, քան տեղում արտադրելը: