«ԲԻ ԼԱՅՆ»-Ն ՍԿՍԵԼ Է ՌՈՒՍԱԿԱՆ ՀԵՔԻԱԹՆԵՐԻ ՄՈՏԻՎՆԵՐՈՎ 15
ԱՆԻՄԱՑԻՈՆ ՖԻԼՄԵՐԻ ՊԱՏՐԱՍՏՈՒՄԸ
29-08-2007 23:20:00 | Հայաստան | Տնտեսություն
ԵՐԵՎԱՆ, 29 ՕԳՈՍՏՈՍԻ, ՆՈՅՅԱՆ ՏԱՊԱՆ: Տեղեկատվական
տեխնոլոգիաների հայկական «Բի Լայն» ընկերությունը իր ռուսաստանյան
գործընկերներից մեկի պատվերով սկսել է ռուսական հեքիաթների
մոտիվներով 15 անիմացիոն ֆիլմերի շարքի պատրաստումը: Կինոնկարներից
յուրաքանչյուրի տեւողությունը լինելու է 13 րոպե: Ինչպես «ՆՈՅՅԱՆ
ՏԱՊԱՆ»-ի թղթակցին հայտնեց «Բի Լայն»-ի նախագահ Հայկ Խանջյանը,
արդեն ավարտվել է առաջին կինոնկարի պատրաստումը եւ սկսվել են
երկրորդի արտադրության աշխատանքները:
Ըստ Հ.Խանջյանի, մի քանի տարի առաջ «Բի Լայն»-ը թողարկել էր
հայկական երեք հեքիաթների անիմացիոն ֆիլմերի լազերային
սկավառակներ` տարբեր լեզուներով կրկնօրինակված: «Ցավոք դրանք
չհաջողվեց վաճառել, ինչի պատճառներից մեկն այն է, որ
սփյուռքահայությունը դեռեւս չի վստահում հայկական արտադրանքին`
գերադասելով արեւմտյանը»,- նշեց «Բի Լայն»-ի նախագահը:
Նա համոզմունք հայտնեց, որ անիմացիոն մուլտիմեդիայի
արտադրությունը Հայաստանի ՏՏ ոլորտի զարգացման հեռանկարային
ուղղություններից մեկն է: Նշվեց, որ էլեկտրոնային բովանդակության
պահանջարկը ներկայումս շատ բարձր է, եւ Հայաստանում պետք է լինի
նման արտադրություն, որպեսզի դրա տարածումով երկրի նկատմամբ
վստահություն ստեղծվի, հայ մշակույթը ճանաչվի օտարների կողմից: