ԱՆՏԱՌԱՅԻՆ ՀՐԴԵՀՆԵՐՈՎ ԲՌՆՎԱԾ ՀՈՒՆԱՍՏԱՆԻ ԱՐԵՎՄՈՒՏՔՈՒՄ
ԵՐԿՐԱՇԱՐԺ Է ՏԵՂԻ ՈՒՆԵՑԵԼ
27-08-2007 16:30:00 | Հունաստան | Միջազգային
ԱԹԵՆՔ, 27 ՕԳՈՍՏՈՍԻ, ՆՈՅՅԱՆ ՏԱՊԱՆ: Օգոստոսի 27-ին Հունաստանի
արեւմուտքում, Կեֆալինիա կղզու շրջանում տեղի է ունեցել 5,1 բալ
մագնիտուդի երկրաշարժ, զոհերի եւ վնասի մասշտաբների մասին տվյալներ
առայժմ չկան, հաղորդում է «Նովոստի» գործակալությունը: Աթենքի
գեոդինամիկայի ինստիտուտի տվյալներով, երկրաշարժը տեղի է ունեցել
տեղական ժամանակով 9:29: Էպիկենտրոնը գտնվել է կղզու արեւմտյան
ափին, երկրի մայրաքաղաք Աթենքից մոտավորապես 300 կիլոմետր
հեռավորությամբ:
Բնական հրդեհները, որ համակել են Հունաստանը, չեն շրջանցել եւ
Կեֆալինիան: Ներկայումս կղզում մոլեգնում է առնվազն մեկ անտառային
հրդեհ: Այն բռնկել է նախորդ օրը երեկոյան կղզու հարավային մասում:
Ինչպես հաղորդում է «Ինտերֆաքսը» վկայակոչելով տեղական
ԶԼՄ-ները, վերջին մեկ օրում Հունաստանի տարածքում բռնկել են կրակի
89 նոր օջախներ: Ընդամենը երկրում մոլեգնում են 30 խոշոր անտառային
հրդեհներ: Կրակը մարելը բարդանում է քամու ուժեղ պոռթկումներից,
որոնց արագությունը գերազանցում է ժամում 70 կիլոմետրը:
Ինքնաթիռներն ու ուղղաթիռները, որ օգտագործում են հրշեջները, չեն
կարող առավելագույնս արդյունավետ գործել մեծ ամպամածության
պատճառով:
Ըստ առողջապահության նախարարության վերջին տվյալների, կրակից
արդեն զոհվել է 63 մարդ: