ԼԻՄԱ, 16 ՕԳՈՍՏՈՍԻ, ՆՈՅՅԱՆ ՏԱՊԱՆ: Օգոստոսի 15-ին Պերուում
տեղի ունեցած երկու երկրաշարժների հետեւանքով, ըստ նախնական
տվյալների, զոհվել է 72 եւ մարմնական տարբեր աստիճանի վնասվածքներ
ստացել 680 մարդ: Այս մասին հաղորդում են տեղական լրատվամիջոցները:
Տեղեկությունների համաձայն, ըստ Ռիխտերի սանդղակի 7,7
մագնիտուդ ուժգնությամբ ստորերկրյա առաջին ցնցմանը մի քանի րոպե
անց հաջորդել է երկրորդը` 7,5 մագնիտուդ ուժգնությամբ:
Երկրաշարժերի էպիկենտրոնը Պերուի մայրաքաղաքից` Լիմայից, գտնվում
է 161 կմ հեռավորության վրա: Ցնցումներն առավելապես զգացվել են Իկա
քաղաքում:
Քաղպաշտպանության ստորաբաժանումները սկսել են էվակուացնել
մայրաքաղաքի ծայրամասերի բնակչությանը հայտարարված ցունամիի վտանգի
պատճառով: Լիմայի հազարավոր բնակիչներ, զգուշանալով նոր
ցնցումներից, շարունակում են մնալ փողոցներում: