ՕԳՈՍՏՈՍԻ 15-ԻՑ «ԱԶԱՏՈՒԹՅՈՒՆ» ՌԱԴԻՈԿԱՅԱՆԻ ՀԱՅԿԱԿԱՆ
ՀԱՂՈՐԴՈՒՄՆԵՐԸ ԿՎԵՐԱՀԵՌԱՐՁԱԿՎԵՆ «ԱՐ ՌԱԴԻՈ»-Ի ՀԱՃԱԽՈՒԹՅՈՒՆՆԵՐՈՎ
02-08-2007 16:20:00 | Հայաստան | Հասարակություն
ԵՐԵՎԱՆ, 2 ՕԳՈՍՏՈՍԻ, ՆՈՅՅԱՆ ՏԱՊԱՆ: «Ազատություն» ռադիոկայանի
հայկական ծառայության հաղորդումները օգոստոսի 15-ից
կվերահեռարձակվեն միջմայրցամաքային «Ար ռադիո»-ի
հաճախություններով: Ըստ Ամերիկյան հեռարձակումների տնօրենների
խորհրդի հաղորդագրության, օրերս ստորագրված համապատասխան
պայմանագիրը ուժի մեջ է մինչեւ 2008 թվականի սեպտեմբերի 14-ը:
Նշվում է, որ «Ար ռադիոն» ունի 23 հաղորդակ, որոնք ծածկում են
Երեւանն ու մի շարք հեռավոր շրջաններ:
Հիշեցնենք, որ Հայաստանի Հանրային ռադիոյի ղեկավարությունը
հուլիսի կեսերին հայտարարել էր, որ օգոստոսի 9-ից դադարեցնելու է
«Ազատություն» ռադիոկայանի հեռարձակումը իր ցանցի 80
հաղորդակներով: «Ազատություն» ռադիոկայանի հայկական ծառայության
ծրագրերը Հայաստանի հանրային ռադիոյի ցանցով հեռարձակվում են
1998թ.-ից: Պայմանագրի երկարաձգման հարցով հուլիսին Երեւանում երեք
օր տեւած բանակցությունները լուծման չհանգեցրին:
«Մենք գոհ ենք, որ բազմաթիվ հայ ունկնդիրները հնարավորություն
կունենան այսուհետ եւս լսել մեր ծրագրերը միջմայրցամաքային «Ար
ռադիո»-ով»,- ասել է «Ազատ Եվրոպա/Ազատություն» ռադիոկայանի
նախագահ Ջեֆրի Գեդմինը: Միաժամանակ նա համոզմունք է հայտնել, որ
«Ազատություն» ռադիոկայանի հաղորդումները պետք է մատչելի լինի
Հայաստանի ողջ տարածքում: «Հարյուր հազարավոր ունկնդիրներ վստահում
են «Ազատություն» ռադիոկայանի հայկական ծառայությանը եւ սպասում են
մեր ճշգրիտ, համակողմանի լրատվությանը»,- նշել է Ջ.Գեդմինը: