ՎԱՇԻՆԳՏՈՆ, 1 ՕԳՈՍՏՈՍԻ, ՆՈՅՅԱՆ ՏԱՊԱՆ: ԱՄՆ-ի զինված ուժերի ռազմավարական հրամանատարության հրամանատար գեներալ Ջեյմս Կարտրայթը հայտարարել է, թե ՆԱՏՕ-ն ԱՄՆ-ի հետ համագործակցությամբ պետք է պատրաստ լինի «Ռուսաստանի վարքագծին հակահարված հասցնելու»: «Երկարաժամկետ խնդիրն է օգնություն ցուցաբերել դաշնակիցներին Ռուսաստանի Դաշնության առնչությամբ մտահոգությունները հաղթահարելու համար, ինչպես նաեւ հիշեցնել հարկ եղած դեպքում ռուսաստանյան վարքագծին համատեղ հակահարված տալու կարեւորության մասին»,- նշվում է ԱՄՆ-ի Սենատում Կարտրայթի նոր պաշտոնում նշանակվելու հետ կապված վերջինիս զեկույցում: Նշենք, որ նախագահ Ջորջ Բուշը ԱՄՆ-ի զինված ուժերի շտաբների ղեկավարների միացյալ կոմիտեի ղեկավարի տեղակալի պաշտոնում առաջադրել է Ջեյմս Կարտրայթի թեկնածությունը: Ամերիկացի գեներալը երկարաժամկետ խնդիրների շարքն է դասել նաեւ «Ռուսաստանում ՆԱՏՕ-ի վերաբերյալ հասարակական կարծիքի վրա դրական ազդեցության, ինչպես նաեւ ժողովրդավարական եւ պաշտպանական բարեփոխումների առաջընթացի ապահովումը». «Պետք է բարելավվի Ռուսաստանի եւ ՆԱՏՕ-ի ռազմա-քաղաքական փոխգործակցությունը ինչպես Եվրոպայում, այնպես էլ գլոբալ մասշտաբներով, ներառյալ հակահրթիռային պաշտպանության ոլորտում»,- նշված է գեներալ Կարտրայթի զեկույցում:

---