ՄԻՆՉԵՎ 2011 ԹՎԱԿԱՆԸ ՀԱՅԱՍՏԱՆԻ ԳՅՈՒՂՏՆՏԵՍՈՒԹՅՈՒՆՆԵՐԸ
ԱՊԱՀՈՎՎԱԾ ԿԼԻՆԵՆ ԱՌԱՋԻՆ ՎԵՐԱՐՏԱԴՐՈՒԹՅԱՆ ՑՈՐԵՆԻ ՍԵՐՄԱՑՈՒՅՈՎ
31-07-2007 20:40:00 | Հայաստան | Տնտեսություն
ԵՐԵՎԱՆ, 31 ՀՈՒԼԻՍԻ, ՆՈՅՅԱՆ ՏԱՊԱՆ: ՀՀ Գյուղատնտեսության
նախարարության եւ «Արմենիան թեքնոլոջի գրուպ» (ATG) հիմնադրամի
նախաձեռնությամբ 2007-2011թթ.-ին կիրականացվի Հայաստանի
սերմնաբուծության զարգացման ծրագիրը, որի նպատակը հանրապետության
բոլոր գյուղացիական տնտեսությունների առաջին վերարատադրության
ցորենի սերմացուի պահանջարկը բավարարելն է: Այս մասին «ՆՈՅԱՆ
ՏԱՊԱՆ»-ի թղթակցի հետ զրույցում հայտնեց ՀՀ Գյուղնախարարության
Երկրագործության վարչության պետ Գագիկ Մանուչարյանը:
Ըստ նրա, ծրագրի շրջանականերում առաջիկա 2 տարիներին
արտերկրից Հայաստան կներկրվի բարձր վերարտադրության «Սուպեր
էլիտար» տեսակի ցորենի սերմացու, որի վերարտադրությունը
կկազմակերպվի Շիրակի մարզի «Գյումրիի սելեկցիոն կայան»-ի, Սյունիքի
մարզի «Սերմարտադրողների միության», Արմավիրի մարզի
«Երկրագործության եւ բույսերի պաշտպանության գիտական կենտրոն»-ի եւ
ATG-ի ցանքատարածություններում:
Նշվեց, որ «Սուպեր էլիտար» եւ «Էլիտար» տեսակներից ստացված
առաջին կարգի սերմացուն անջրդի պայմաններում կարող է ապահովել մեկ
հեկտարից 9-10 տոննա բերքատվություն` ներկայումս Հայաստանում
շրջանառվող 15-20-րդ վերարտադրության ցորենի 4-5 տոննայի դիմաց: