ԱՄՆ-Ի ՊԵՏՔԱՐՏՈՒՂԱՐԸ ԻՐԱՆԸ ՍՊԱՌՆԱԼԻՔ Է ՀԱՄԱՐԵԼ
ՄԵՐՁԱՎՈՐԱՐԵՎԵԼՅԱՆ ՏԱՐԱԾԱՇՐՋԱՆԻ ՀԱՄԱՐ
31-07-2007 18:15:00 | ԱՄՆ | Միջազգային
ՎԱՇԻՆԳՏՈՆ, 31 ՀՈՒԼԻՍԻ, ՆՈՅՅԱՆ ՏԱՊԱՆ: Մերձավոր Արեւելքում են
գտնվում ԱՄՆ-ի պետքարտուղար Քոնդոլիզա Ռայսը եւ Պենտագոնի ղեկավար
Ռոբերտ Գեյթսը: Նրանց առաջին համատեղ ուղեւորությունն սկսվելուց
առաջ Վաշինգտոնը հայտարարեց Իսրայելին եւ Եգիպտոսին 40 մլրդ.
դոլարից ավելի ռազմական օգնություն հատկացնելու մտադրության մասին:
Հուլիսի 31-ին Ռայսը եւ Գեյթսը ժամանել են եգիպտական Շարմ
էշ-Շեյխ: Եգիպտոսից հետո նրանք միասին կմեկնեն Սաուդյան Արաբիա:
Տարածաշրջանի մյուս երկրներ նրանք կայցելեն առանձին-առանձին:
Եգիպտոսի ճանապարհին Քոնդոլիզա Ռայսը հասկանալ է տվել, որ
ճամփորդության նպատակը Իրանի եւ Սիրիայի եւ նրանց հետ կապված
իսլամիստական շարժումների, ինչպիսին լիբանանյան «Հզբոլլահն» է,
ակտիվացման պայմաններում Մերձավոր Արեւելքում ԱՄՆ-ի դաշնակիցների
ջանքերը համախմբելն է:
«Ենթադրում եմ, որ ոչ մի կասկած չկա, որ Իրանը
նշանակալի սպառնալիք է ներկայացնում ամերիկյան շահերին
Մերձավոր Արեւելքում եւ մերձավորարեւելյան մեր տեսլականին»,- Շարմ
էշ-Շեյխի ճանապարհին լրագրողներին է հայտարարել Ռայսը:
Ավելի վաղ Ռայսը հաստատել էր, որ Վաշինգտոնը առաջիկա տասը
տարիներին 30 մլրդ. դոլարի ռազմական օգնություն կցուցաբերի
Իսրայելին եւ 13 մլրդ.` Եգիպտոսին: Համապատասխան բանակցություններ
են վարվում նաեւ Սաուդյան Արաբիայի եւ Պարսից ծոցի մյուս
պետությունների հետ:
Իրանի ԱԳՆ ներկայացուցիչ Մոհամմադ Ալի Խոսսեյնին ի պատասխան
ԱՄՆ-ի պետքարտուղարի հայտարարությանը Վաշինգտոնին մեղադրել է
տարածաշրջանի պետություններին միմյանց դեմ լարելու մեջ: