ԲԵԼԳՐԱԴ, 25 ՀՈՒԼԻՍԻ, ՆՈՅՅԱՆ ՏԱՊԱՆ: Սերբիայի խորհրդարանը` Սկուպշչինան, հաստատել է կոսովյան հարցով իր նոր դիրքորոշումը: Համաձայն դրա, Սերբիան Կոսովոն դիտել եւ դիտելու է իր տարածքի մաս: Միեւնույն ժամանակ երկրամասին տրամադրվում է ամենալայն ինքնավարություն, իսկ բնակչության ինքնակառավարման իրավունքը երաշխավորում է միջազգային հանրությունը: Այս դիրքորոշմամբ, որ հաստատվել է ձայների բացարձակ մեծամասնությամբ, Բելգրադը հանդես կգա բանակցությունների հաջորդ փուլում: Իսկ Կոսովոյի առաջնորդները հուլիսի 24-ին Վաշինգտոնում հանդիպում են ունեցել ԱՄՆ-ի պետքարտուղար Կոնդոլիզա Ռայսի հետ: Պրիշտինայի պատվիրակությունը հայտարարել է, որ միակողմանի կարգով անկախություն չի հայտարարի: Ըստ որում կոսովյան նախարարները ընդգծել են, որ կցանկանային, որպեսզի հարցը լուծվեր Մարտի Ախտիսաարիի ծրագրի հիման վրա, որ նախատեսում է փաստացի աստիճանական անցում երկրամասի անկախությանը:

---