ՌԵԺԻՍՈՐ ԱՐՏԱԿ ԱՎԴԱԼՅԱՆԸ ՊԱՏՐԱՍՏՎՈՒՄ Է ՆԿԱՐԱՀԱՆԵԼ ՊԱՏՄԱԿԱՆ
ԿԻԼԻԿԻԱՅԻՆ ՆՎԻՐՎԱԾ ՎԱՎԵՐԱԳՐԱԿԱՆ ՖԻԼՄ
18-07-2007 18:40:00 | Հայաստան | Մշակույթ
ԵՐԵՎԱՆ, 18 ՀՈՒԼԻՍԻ, ՆՈՅՅԱՆ ՏԱՊԱՆ: Կինովավերագրող Արտակ
Ավդալյանը պատրաստվում է նկարահանել պատմական Կիլիկիային նվիրված
ֆիլմ: Ինչպես «ՆՈՅՅԱՆ ՏԱՊԱՆ»-ի թղթակցին հայտնեց ռեժիսորը, ֆիլմը
բաղկացած է լինելու 4 մասից: Առաջին մասում կներկայացվի
նախաթագավորության ժամանակաշրջանը, երկրորդում` Կիլիկիայի
թագավորության հիմնումը եւ զորացումը, իսկ երրորդում`
թագավորության անկումը, դրա պատճառները եւ նախկին թագավորության
տարածքում տեղի ունեցած իրադարձությունները` մինչեւ 1915թ.-ը
Օսմանյան Թուրքիայում իրականացված Հայոց ցեղասպանությունը
ներառյալ:
«Այսինքն փորձելու ենք ցույց տալ, որ թագավորության անկումից
հետո հայերը ոչ միայն շարունակել են գոյատեւել Կիլիկիայում, այլեւ
բոլոր բնագավառներում ունեցել են հաջողություններ»,- նշեց
Ա.Ավդալյանը: Ֆիլմի չորրորդ մասը, ըստ ռեժիսորի, կպատմի աշխարհով
մեկ սփռված կիլիկիացիների ժառանգների, ինչպես նաեւ ներկայումս
Կիլիկիայի տարածքում բնակվող մահմեդականացած հայերի մասին:
Ա.Ավդալյանի խոսքերով, նման մեծածավալ կինոփաստաթղթի ստեղծման
նախապատրաստական փուլում ինքը համագործակցել է պատմաբանների հետ,
որոնց օժանդակությամբ էլ գրվել է ֆիլմի սցենարը: Միաժամանակ
ռեժիսորը նշեց, որ հաջորդ փուլի` ֆիլմի նկարահանման աշխատանքների,
համար անհրաժեշտ է հովանավորների օժանդակությունը: