ՎԻԵՆՆԱ, 16 ՀՈՒԼԻՍԻ, ՆՈՅՅԱՆ ՏԱՊԱՆ: ՄԱԿ-ի Ատոմային էներգիայի
միջազգային գործակալության (ՄԱԳԱՏԷ) տեսուչները հաստատել են, որ
Հյուսիսային Կորեան կանգնեցրել է Յոնգ-Բանգի միջուկային ռեակտորը,
հայտնել է կազմակերպության ղեկավար Մոհամեդ Բարադեին:
ՄԱԳԱՏԷ-ի 10 տեսուչների պատվիրակությունը երկիր է ժամանել
Հարավային Կորեայից մազութի առաջին բեռնափոխադրման հետ նույն օրը:
Վառելիքի մատակարարումները փետրվարին երկու Կորեաների, Չինաստանի,
ԱՄՆ-ի, Ճապոնիայի եւ Ռուսաստանի մասնակցությամբ
բանակցություններում ձեռք բերված Փխենյանի միջուկային ծրագրի
դադարեցման վերաբերյալ համաձայնության նախապայմաններից մեկն է:
Հուլիսի 18-ին Պեկինում պետք է սկսվի բանակցությունների
հաջորդ փուլը հյուսիսկորեական միջուկային օբյեկտների ապամոնտաժման
վերաբերյալ, այնպես, որպեսզի դրանք ընդմիշտ շահագործումից հանվեն:
Հունիսին տեսուչների համար առաջին անգամ 2002 թվականից ի վեր
հնարավոր էր դարձել մուտք գործել Յոնգ-Բանգի օբյեկտ: