ԻՐԱՆԻ ԵՎ ՄԱԳԱՏԷ-Ի ՄԻՋԵՎ ԲԱՆԱԿՑՈՒԹՅՈՒՆՆԵՐԸ ԿՎԵՐՍԿՍՎԵՆ
ՀՈՒԼԻՍԻ 25-ԻՆ ՎԻԵՆՆԱՅՈՒՄ
16-07-2007 16:30:00 | Ավստրիա | Միջազգային
ՎԻԵՆՆԱ, 16 ՀՈՒԼԻՍԻ, ՆՈՅՅԱՆ ՏԱՊԱՆ: Իրանի եւ Ատոմային
էներգիայի միջազգային գործակալության (ՄԱԳԱՏԷ) միջեւ իրանական
միջուկային խնդրին նվիրված բանակցությունների հերթական փուլը
կկայանա հուլիսի 25-26-ին Վիեննայում, հաղորդում է «Ֆրանսպրես»
գործակալությունը վկայակոչելով ՄԱԳԱՏԷ-ին առընթեր Իրանի մշտական
ներկայացուցիչ Ալի Ասգարա Սոլթանիեին:
Ավելի վաղ` հուլիսի 13-ին Իրանի իշխանությունները հայտարարել
էին երկրի միջուկային օբյեկտները ՄԱԳԱՏԷ-ի տեսուչների այցելության
արգելքը վերացնելու մասին: Այդ մասին համաձայնություն էր ձեռք
բերվել Թեհրանում գործակալության պատվիրակության անցած շաբաթ
կայացած այցի ժամանակ: Մասնավորապես, կողմերը պայմանավորվել են, որ
հուլիսի վերջին ՄԱԳԱՏԷ-ի տեսուչները կայցելեն Արաք քաղաքում գտնվող
ծանր ջրով աշխատող հետազոտական միջուկային ռեակտոր:
Բանակցությունների ժամանակ իրանական կողմը նաեւ հավաստել է իր
պատրաստակամությունը պատասխանելու ՄԱԳԱՏԷ-ի ներկայացուցիչների
հարցերին այն աշխատանքների վերաբերյալ, որ կատարվում են այդ
օբյեկտներում: