ՏՐԻՊՈԼԻ, 11 ՀՈՒԼԻՍԻ, ՆՈՅՅԱՆ ՏԱՊԱՆ: Լիբիայի Գերագույն դատարանը հուլիսի 11-ին վերահաստատել է բուլղարացի 5 բուժքույրերի եւ պաղեստինցի բժշկի մահվան դատավճիռը: Այս մասին հաղորդում է «Reuters» գործակալությունը: Այսպիսով, Գերագույն դատարանը մերժեց ամբաստանյալների փաստաբանների` փետրվարի 17-ին ներկայացված բողոքարկումը: Սակայն նրանք դեռ ունեն Լիբիայի Արդարադատության գերագույն խորհրդի կողմից ներման արժանանալու հնարավորություն: Նշենք, որ 1999թ. բուլղարացի 5 բուժքույրերը եւ պաղեստինցի բժիշկը Լիբիայում ձերբակալվել էին 400-ից ավելի լիբիացի երեխաների ՄԻԱՎ-ով կանխամտածված վարակելու մեղադրանքով: 2004թ. դատարանը մեղադրյալներին դատապարտել էր մահապատժի: Սակայն բժիշկները պնդում էին, թե անմեղ են, եւ իրենց խոստովանական ցուցմունքները կորզվել են խոշտանգումների միջոցով:

---