ՎԵՆԵՍՈՒԵԼԱՅԻ ՆԱԽԱԳԱՀԸ ՉԻ ԲԱՑԱՌՈՒՄ ԻՐ ԵՐԿՐՈՒՄ ԱՏՈՄԱՅԻՆ
ԷՆԵՐԳԵՏԻԿԱՅԻ ԶԱՐԳԱՑՄԱՆ ՀԱՎԱՆԱԿԱՆՈՒԹՅՈՒՆԸ
28-06-2007 22:56:00 | Ռուսաստան | Միջազգային
ՄՈՍԿՎԱ, 28 ՀՈՒՆԻՍԻ, ՆՈՅՅԱՆ ՏԱՊԱՆ: Վենեսուելայի նախագահ Ուգո
Չավեսը ժամանել է Մոսկվա, որտեղ հանդիպում է ունենալու Ռուսաստանի
նախագահ Վլադիմիր Պուտինի, ինչպես նաեւ այլ պաշտոնատար անձանց հետ:
Վենեսուելայի նախագահի այցելության գլխավոր նպատակը
Ռուսաստանի հետ սուզանավեր եւ հակաօդային համակարգեր ձեռք բերելու
պայմանագրերի քննարկումն է:
Նախկինում Վենեսուելան Ռուսաստանից գնել է 3 միլիարդ
դոլարի սպառազինություն, այդ թվում` ռազմական ուղղաթիռներ, ՍՈւ-30
կործանիչներ եւ Կալաշնիկով տիպի 100 հազար հատ ինքնաձիգներ:
Ինչպես տեղեկացնում է «Իտառ Տասս»-ը, Մոսկվայում Ուգո Չավեսը
չի բացառել Վենեսուելայում ատոմային էներգետիկայի զարգացման
հավանականությունը. «Ով գիտե, հնարավոր է, որ Վենեսուելան գնա այդ
ուղղությամբ»,- հայտարարել է Չավեսը:
Վենեսուելայի նախագահը միեւնույն ժամանակ ընդգծել է, որ
«ԱՄՆ-ը պետք է հասկանա, որ ինքը չպետք է կառավարի աշխարը: Հանուն
խաղաղության նա պետք է իր զորքերը հանի Իրաքից եւ հրաժարվի Իրանի
վրա հարձակումներ գործելուց: Իրանը ազատ երկիր է եւ խաղաղ ատոմային
էներգետիկայի զարգացման իրավունք ունի»:
Նշվում է նաեւ, որ Չավեսը այցելելու է Բելառուս եւ Իրան: