«ՍՊԵՂԱՆԻ» ԵՐԳՉԱԽՈՒՄԲԸ ՄԱՐԿՈԲԵՐԴՈՐՖՈՒՄ ԿԱՅԱՑԱԾ ՄԻՋԱԶԳԱՅԻՆ
ՓԱՌԱՏՈՆՈՒՄ ՃԱՆԱՉՎԵԼ Է «ԼԱՎԱԳՈՒՅՆ ԵՐԳՉԱԽՈՒՄԲ»
12-06-2007 18:35:00 | Հայաստան | Մշակույթ
ԵՐԵՎԱՆ, 12 ՀՈՒՆԻՍԻ, ՆՈՅՅԱՆ ՏԱՊԱՆ: ՀՀ Մշակույթի
նախարարության աջակցությամբ միջազգային մրցույթների դափնեկիր
«Սպեղանի» երգչախումբը մայիսի 25-30-ին Մարկոբերդորֆում (Գերմանիա)
կայացած կամերային երգչախմբերի միջազգային 10-րդ փառատոնում
ճանաչվել է «Լավագույն երգչախումբ» եւ արժանացել պատվոգրի: Ինչպես
հունիսի 12-ի ասուլիսում հայտնեց երգչախմբի գեղարվեստական ղեկավար
եւ խմբավար Սարինա Ավթանդիլյանը, փառատոնի արդյունքներով
«Սպեղանին» ընդգրկվել է աշխարհի լավագույն 13 երգչախմբերի շարքում:
Ս.Ավթանդիլյանը հայտնեց, որ երգչախումբը մասնակցել է նաեւ
մայիսի 15-20-ին Շվեցարիայի Բազել քաղաքում անցկացված
երիտասարդական երգչախմբերի եվրոպական փառատոնին: «Տարբեր ազգերի
դիրիժորներին հիացրեց երգչախմբի կատարումը: Մարկոբերդորֆում մեր
ելույթից անմիջապես հետո եվրոպական մի շարք քաղաքներում
հյուրախաղերով հանդես գալու հրավերներ ստացանք»,- նշեց երգչախմբի
ղեկավարը:
Բազելի եւ Մարկոբերդորֆի փառատոներում «Սպեղանին» ներկայացրել
է հայ հոգեւոր միջնադարյան երաժշտության նմուշները, Կոմիտասի,
Մակար Եկմալյանի, Երվանդ Երկանյանի եւ ժամանակակից հայ
կոմպոզիտորների ստեղծագործությունները: Ս.Ավթանդիլյանի խոսքերով,
օտարազգի ունկնդրին գրավել է հատկապես Երվանդ Երկանյանի «Սիրիուս»
ստեղծագործությունը: Ըստ նրա, Բեռնի հայ-շվեցարական ասոցիացիայի
նախագահ Սարգիս Շահինյանը ցանկություն է հայտնել երգչախմբի այդ
կատարումը օգտագործել Անիի մասին նկարահանվող ֆիլմում:
Նշենք, որ «Սպեղանիի» կազմում ընդգրկված են Արցախյան
պատերազմում զոհված ազատամարտիկների երեխաները: 2004թ.-ին
երգչախումբն արժանացել է Իտալիայի Արեցցո քաղաքում կայացած
խմբերգային երաժշտության հեղինակավոր մրցույթի 2-րդ մրցանակին:
Երգչախումբը մի շարք խմբերգային ստեղծագործությունների առաջին
կատարողն է Հայաստանում: «Սպեղանին» համերգներ է ունեցել
Լիբանանում, Հռոմում, Միլանում եւ եվրոպական մի շարք քաղաքներում: