ԱՅՍ ՏԱՐՎԱ ՀՈՒՆՎԱՐ-ՓԵՏՐՎԱՐԻՆ ՆԱԽՈՐԴ ՏԱՐՎԱ ՆՈՒՅՆ ԱՄԻՍՆԵՐԻ
ՀԱՄԵՄԱՏ ԵՐԵՎԱՆՈՒՄ 12,57-%ՈՎ ԱՃԵԼ Է ԳՐԱՆՑՎԱԾ ՀԱՆՑԱԳՈՐԾՈՒԹՅՈՒՆՆԵՐԻ
ԹԻՎԸ
19-03-2007 17:58:00 | Հայաստան | Հասարակություն
ԵՐԵՎԱՆ, 19 ՄԱՐՏԻ, ՆՈՅՅԱՆ ՏԱՊԱՆ: 2007թ.-ի հունվար-փետրվարին
Երեւանում գրանցվել է 659 հանցագործություն, ինչը 73 դեպքով կամ
12,5%-ով ավելի է նախորդ տարվա նույն ժամանակահատվածի ցուցանիշից:
Հայտնելով այս մասին մարտի 19-ին լրագրողների հետ հանդիպմանը,
ոստիկանության Երեւան քաղաքի վարչության պետ, ոստիկանության
գեներալ-մայոր Ներսես Նազարյանը պարզաբանեց, որ
հանցագործությունների թվի աճը պայմանավորված է «լատենտային
հանցագործությունների հայտնաբերման եւ կատարված
հանցագործությունների առավել լիարժեք գրանցման հետեւողական
քաղաքականությամբ»:
Այս տարվա առաջին երկու ամսում Երեւանում կատարվել է 6
դիտավորյալ սպանություն` նախորդ տարվա նույն ժամանակահատվածի 5-ի
դիմաց: Սպանություններից 4-ը արդեն բացահայտվել են:
Վնասազերծվել է 15 հանցավոր խումբ` 42 անձով: Արդեն
բացահայտվել է նրանց կողմից կատարված 63 հանցագործության դեպք:
41%-ով նվազում է նկատվել խուլիգանության եւ 33%-ով
կողոպուտների դեպքերով: Ն.Նազարյանը որպես դրական միտում նշեց նաեւ
այն, որ 40%-ով պակասել է հրազենի գործադրմամբ կատարված
հանցագործությունների քանակը: Ոստիկանության մարմինների կողմից
առգրավվել եւ հանձնվել է բնակչության մոտ ապօրինաբար պահվող 18
միավոր հրազեն, այդ թվում 2 ինքնաձիգ, 9 ատրճանակ, 3 նռնակ եւ
տարբեր տրամաչափի շուրջ 300 փամփուշտներ:
Թմրամիջոցների դեմ պայքարի ցուցանիշների 24 դեպքով կամ 80%-ով
աճը, ըստ Ն.Նազարյանի, անցած տարի սկսված դրական տեղաշարժերի
շարունակությունն է: Համարյա կրկնակի աճել են թմրավաճառների
հայտնաբերման փաստերը: 2007թ.-ի առաջին 2 ամիսներին առգրավվել են
760 գրամ տարբեր տեսակի թմրամիջոցներ:
Անհանգստացնող է բնակարանային գողությունների աճը` 24 դեպքով
կամ 52%-ով: Դրանց մեջ գերակշռում են պատուհանից ներս մտնելու
միջոցով գողությունները` 34, փականը կոտրելու միջոցով
գողությունները` 16, հարմարեցված բանալիների միջոցով
գողությունները` 12, բաց դռներից ներս մտնելու միջոցով
գողությունները` 8:
Ընթացիկ տարվա 2 ամիսներին դիտարկվել է ավտոառեւանգումների
աճի միտում` գրանցվել է նման 28 դեպք, որից 9-ը դեռեւս չեն
բացահայտվել, 19 ավտոմեքենա հայտնաբերվել են թալանված վիճակում: 23
դեպքում առեւանգումները կատարվել են շենքերի բակերից, 5-ը`
փողոցներից: Դրանցից 22-ը կատարվել են գիշերային ժամերի:
Այս տարի գրանցված գործերի բացահայտումը աճել է եւ կազմել է
83,9%` նախորդ տարվա նույն ժամանակահատվածի 83,1%-ի դիմաց: Ծանր
դեպքերի բացահայտումը կազմել է 71,7%` նախորդ տարվա նույն
ժամանակահատվածի 71,4%-ի դիմաց, առանձնապաես ծանր գործերով
բացահայտումը կազմել է 60%: