ԱՐՄԱՆ ԲԱԲԱՋԱՆՅԱՆԻ ՊԱՇՏՊԱՆՆԵՐԸ ՄՏԱԴԻՐ ԵՆ ԴԻՄԵԼ ՀՀ
ՍԱՀՄԱՆԱԴՐԱԿԱՆ ԵՎ ՄԱՐԴՈՒ ԻՐԱՎՈՒՆՔՆԵՐԻ ԵՎՐՈՊԱԿԱՆ ԴԱՏԱՐԱՆՆԵՐ
12-03-2007 20:00:00 | Հայաստան | Հասարակություն
ԵՐԵՎԱՆ, 12 ՄԱՐՏԻ, ՆՈՅՅԱՆ ՏԱՊԱՆ: Մարտի 11-ին «Ժամանակ
Երեւան» թերթի նախկին գլխավոր խմբագիր Արման Բաբաջանյանի
պաշտպաններին է վերադարձվել իրենց վճռաբեկ բողոքը: Այս մասին մարտի
12-ի ասուլիսում հայտնեցին լրագրողի պաշտպաններ Հայկ Ալումյանն ու
Զարուհի Փոստանջյանը: Ըստ պաշտպանական կողմի, վճռաբեկ բողոքը
վերադարձվել է օրենքի կոպիտ խախտումներով. բողոքը ներկայացվել է
հունվարի 22-ին եւ այն ընդունելու կամ ընդունումը մերժելու
որոշումը պետք է կայացվեր 10 օրվա ընթացքում, այսինքն փետրվարի
1-ին: Մինչդեռ մարտի 6-ին փաստաբան Զ.Փոստանջյանի հարցմանն ի
պատասխան բանավոր ասվել է, որ որեւէ որոշում ՀՀ Վճռաբեկ դատարանը
դեռեւս չի կայացրել: Մարտի 7-ին Վճռաբեկ դատարանին գրավոր դիմելուց
հետո, որտեղ մատնանշվում էին օրենքի խախտումները, ստացվել է
փետրվարի 26-ի` այսինքն հետին թվագրությամբ որոշում` վճռաբեկ
բողոքը վերադարձնելու մասին: Պաշտպանները ուշադրություն հրավիրեցին
նաեւ այն բանի վրա, որ բողոքը ընդունելու մերժման որոշումը տրվում
է ստանդարտ պատճառաբանություն:
Պաշտպանական կողմը մտադիր է դիմել ՀՀ Սահմանադրական եւ Մարդու
իրավունքների Եվրոպական դատարաններ: Որպես դիմումի հիմք
ներկայացվելու են ՀՀ Սահմանադրության հոդվածների խախտումները.
մասնավորապես, սահմանադրությամբ դատախազությունը չունի
նախաքննություն իրականացնելու լիազորություն եւ նման լիազորություն
թույլ տվող քրեական դատավարության օրենսգրքի համապատասխան հոդվածը
հակասում է սահմանադրությանը: Պաշտպանական կողմը մտադիր է նաեւ
վիճարկել վճռաբեկ բողոքը վերադարձնելու աբստրակտ ձեւակերպման,
ինչպես նաեւ զորակոչից խուսափող անձանց քրեական
պատասխանատվությունից ազատող միջգերատեսչական հանձնաժողովի
լիազորության սահմանադրականությունը: