ՊԱՐԶՎԵԼ ԵՆ «ՌԵԼԱՔՍ» ԴԻՍԿՈ-ԱԿՈՒՄԲՈՒՄ ԿԱՏԱՐՎԱԾ ՍՊԱՆՈՒԹՅԱՆ
ՄԱՆՐԱՄԱՍՆԵՐԸ
20-02-2007 14:30:00 | Հայաստան | Հասարակություն
ԵՐԵՎԱՆ, 20 ՓԵՏՐՎԱՐԻ, ՆՈՅՅԱՆ ՏԱՊԱՆ: Պարզվել են փետրվարի
15-ին «Ռելաքս» դիսկո-ակումբում տեղի ունեցած Արտաշ Օթարի
Համբարձումյանի եւ Մհեր Սերյոժայի Պողոսյանի սպանության
մանրամասները: Այս մասին հայտնում է ՀՀ Գլխավոր դատախազության
մամլո ծառայությունը:
Նախաքննությամբ ձեռք բերված ապացույցների համաձայն, ՀՀ
քաղաքացի Վ.Գեւորգյանը փետրվարի 15-ին` ժամը 03:45-ի սահմաններում,
Երեւան քաղաքի Տերյան փողոցի 105/1 հասցեում գտնվող «Ցիտադել
բիզնես կենտրոն» համալիրի առաջին հարկում տեղակայված «Ռելաքս»
դիսկո-ակումբի սրահում վիճաբանել է Մ.Պողոսյանի եւ
Ա.Համբարձումյանի հետ, ինչի հետեւանքով առաջացած քաշքշոցը
տեղափոխվել է ակումբի տնօրենի աշխատասենյակի հարեւանությամբ գտնվող
ծառայողական մուտքի դիմացի հատվածը: Վեճի ընթացքում Վ.Գեւորգյանն
իր մոտ օրինական հիմքերով գտնվող «Վիկինգ» տեսակի 9 մմ տրամաչափի
ատրճանակից, սպանելու դիտավորությամբ, շատերի կյանքի համար
վտանգավոր եղանակով կրակոցներ է արձակել Մ.Պողոսյանի եւ
Ա.Համբարձումյանի կյանքի համար կենսական նշանակություն ունեցող
օրգանների` գլխի եւ կրծքավանդակի շրջանի, ուղղությամբ եւ
ապօրինաբար զրկել նրանց կյանքից: Դեպքից հետո Վ.Գեւորգյանը դիմել է
փախուստի:
Ձեռք բերված ապացույցների հիման վրա փետրվարի 17-ին որոշում է
կայացվել Վ.Գեւորգյանին որպես մեղադրյալ ներգրավելու եւ նրան ՀՀ
քրեական օրենսգրքի 104-րդ հոդվածի 2-րդ մասի 1-ին եւ 6-րդ կետերով
մեղադրանք առաջադրելու մասին: Նույն օրը նրա նկատմամբ հայտարարվել
է հետախուզում: Նախաքննությունը շարունակվում է:
Հիշեցնենք, որ սպանության կապակցությամբ տարածված առաջին
պաշտոնական հաղորդագրությունում նշված էր, որ «օպերատիվ ձեռնարկված
միջոցառումների արդյունքում հաջողվել է պարզել հրաձգությանը
մասնակցած երկու անձանց ինքնությունը»: Ըստ «Առավոտ» օրաթերթի, որը
հղում է կատարել ոստիկանության իր աղբյուրներին, «սպանությանը
մասնակից երկու անձանց ինքնությունն արագորեն պարզվել է
դիսկո-ակումբում տեղադրված տեսախցիկների շնորհիվ, որոնք արձանագրել
էին սպանությունն առաջին իսկ վայրկյաններից մինչեւ վերջին պահը»: