ԿԱՀԻՐԵՈՒՄ ԲԱՑՎԵԼ Է ԹԵՆԻ ՎԱՐԴԱՆՅԱՆԻ ՆԿԱՐՆԵՐԻ ՑՈՒՑԱՀԱՆԴԵՍԸ
14-02-2007 21:45:00 | Եգիպտոս | Մշակույթ
ԿԱՀԻՐԵ, 14 ՓԵՏՐՎԱՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Կահիրեում` Ահմադ Շաուկիի թանգարանի ցուցահանդեսների սրահում,
բացվել է հայաստանցի նկարչուհի Թենի Վարդանյանի նկարների
ցուցահանդեսը` նվիրված Հայաստանի եւ Եգիպոտսի միջեւ դիվանագիտական
հարաբերությունների հաստատման 15-ամյակին:
Եգիպտոսում ՀՀ դեսպանության նախաձեռնությամբ փետրվարի 13-ին
բացված ցուցահանդեսին ներկայացված են նկարչուհու լավագույն
աշխատանքները, այդ թվում նաեւ հունվարին Կահիրեի 10-րդ միջազգային
բիենալեին ներկայացված այն նկարները, որոնք Եգիպտոսի Արաբական
Հանրապետության Մշակույթի նախարարության մրցանակային հանձնաժողովի
կողմից արժանացել էին «Ոսկե մեդալ» պարգեւի:
Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ ԱԳՆ Մամուլի եւ
տեղեկատվության վարչությունից, ցուցահանդեսի պաշտոնական բացման
արարողությանը ներկա են եղել Եգիպտոսում հավատարմագրված օտարերկրյա
դեսպաններ, արվեստի բնագավառի գործիչներ, ինչպես նաեւ` հայ
համայնքի ներկայացուցիչներ:
Ցուցահանդեսը գործելու է մինչեւ փետրվարի 17-ը: