ԱՅՍ ՏԱՐԻ ԵՐԵՎԱՆ ԿՆԵՐԿՐՎԵՆ ԵՎՍ 150 ՄԵԾ ԵՎ ՄԻՋԻՆ
ՏԵՂԱՏԱՐՈՂՈՒԹՅԱՄԲ ԱՎՏՈԲՈՒՍՆԵՐ
13-02-2007 18:05:00 | Հայաստան | Հասարակություն
ԵՐԵՎԱՆ, 13 ՓԵՏՐՎԱՐԻ, ՆՈՅՅԱՆ ՏԱՊԱՆ: Մայրաքաղաքի հասարակական
տրանսպորտի ոլորտը բարելավելու համար առաջին հերթին պետք է
միկրոավտոբուսները փոխարինել մեծ եւ միջին տեղատարողությամբ
ավտոբուսներով: Ինչպես փետրվարի 13-ի ասուլիսում հայտնեց Երեւանի
փոխքաղաքապետ Կամո Արեյանը, ներկայումս մայրաքաղաքում շահագործվում
են մեծ եւ միջին տեղատարողութամբ 253 ավտոբուսներ, որոնցից 151-ը`
«Բոգդան» մակնիշի:
Կ.Արեյանի խոսքերով, մայրաքաղաքում շահագործվող մոտ 3300
միկրոավտոբուսների քանակը կրճատելու համար անհրաժեշտ է ներկրել եւս
800 ավտոբուսներ: Ըստ նրա, աշխատանքներ են տարվում, որպեսզի
առաջիկա 3 տարիներին մայրաքաղաքի հասարակական տրանսպորտի պարկը
համալրվի նշված քանակությամբ ավտոբուսներով: Այս տարի նախատեսվում
է ներկրել 150 ավտոբուս, որի համար կհատկացվի 1,7 մլրդ դրամ:
Փոխքաղաքապետը հայտնեց, որ թեեւ 2006թ.-ին Երեւանում
տեղադրվել են մոտ 100 կանգառասրահներ` երթուղիների համարներով,
գծանշաններով, սակայն հասարակական տրանսպորտի միջոցները
շարունակում են կայանել կանգառներից դուրս: Այդ կապակցությամբ, ըստ
Կ.Արեյանի, քաղաքապետի կողմից պետավտոտեսչությանը տրվել է
համապատասխան հանձնարարական: