ՓԱՐԻԶԻ ԳԵՂԱՐՎԵՍՏԻ ԲԱՐՁՐԱԳՈՒՅՆ ԱԿԱԴԵՄԻԱՅՈՒՄ ԿԲԱՑՎԻ Ս.
ՓԱՐԱՋԱՆՈՎԻ ԱՇԽԱՏԱՆՔՆԵՐԻ ԱՄԵՆԱՄԵԾ ՑՈՒՑԱԴՐՈՒԹՅՈՒՆԸ
12-02-2007 17:20:00 | Հայաստան | Մշակույթ
ԵՐԵՎԱՆ, 12 ՓԵՏՐՎԱՐԻ, ՆՈՅՅԱՆ ՏԱՊԱՆ: Փարիզի Գեղարվեստի
բարձրագույն ակադեմիայում փետրվարի 12-ին բացվում է «Փառահեղ
Փարաջանով» ամենամեծ ցուցադրությունը, որտեղ կներկայացվեն հայ մեծ
արվեստագետ Սերգեյ Փարաջանովի 72 գործերը: Այն կտեւի մինչեւ ապրիլի
8-ը, որից հետո աշխատանքները կտեղափոխվի Սենտ Էթիենի ժամանակակից
արվեստի թանգարան, ուր կցուցադրվեն ապրիլի 25-ից մայիսի 20-ը: Այս
մասին «ՆՈՅՅԱՆ ՏԱՊԱՆ»-ի թղթակցին հայտնեց Ս.Փարաջանովի թանգարանի
տնօրեն Զավեն Սարգսյանը:
Թանգարանի տնօրենի խոսքերով, Ֆրանսիայում Հայաստանի տարվա
միջոցառումների շրջանակներում տարբեր քաղաքներում բացվել եւ
շարունակվում են բացվել Ս.Փարաջանովի ժառանգությունը ներկայացնող
տարբեր ցուցահանդեսներ:
«Հայաստանի տարին Ֆրանսիայում գերազանց հնարավորություն է
ֆրանսիացի հանդիսատեսի համար` ծանոթանալու կամ վերհիշելու կինոյի,
գեղանկարչության, ի վերջո մեծ փիլիսոփայի ստեղծագործություններին,
որոնք ամենավառ գույներն են հաղորդում Ֆրանսիայում Հայաստանի տարվա
ցուցադրություններին»,- ասաց Զավեն Սարգսյանը:
Ցուցադրություններից ամենաառաջինը բացվել է հունվարի 9-ին
Թուլուզի Սինեմատեկում` ներկայացնելով մեծ վարպետի 30
կինոէսքիզները եւ բեմադրված ներկայացումների նկարազարդումները:
Փարիզի Բուբինիի արվարձանում մարտի 9-25-ն անցկացվելիք
փարաջանովյան ֆիլմերի փառատոնը նույնպես կուղեկցվի նրա վրձնած
կտավների ցուցահանդեսով: Այդ օրերին բացի վարպետի ֆիլմերից
կներկայացվեն նաեւ հայ ռեժիսորի հետ հոգեւոր մտերմություն հաստատած
Տարկովսկու, Ֆելինիի, Պազոլինիի ֆիլմերը: Կանցկացվի նաեւ
փարաջանովյան ֆիլմերի հետահայաց ցուցադրություն:
Ֆրանսիական կողմը տպագրության է պատրաստում նաեւ Փարաջանովին
նվիրված 170-էջանոց մեծ պատկերագիրք: