Մեսրոպյան վարժարանի երեք ուսանողներ պարգեւատրվել են
բակալավրիատի պետական քննությունները գերազանց հանձնելու համար
06-11-2009 19:05:00 | Լիբանան | Հասարակություն
ԲԵՅՐՈՒԹ, 6 ՆՈՅԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Հոկտեմբերի 30-ին, ՀՅԴ «Զավարյան» ուսանողական միության
նախաձեռնությամբ Համազգայինի «Լեւոն Շանթ» մշակութային կենտրոնի
«Գ. եւ Հ. Արմենյան» սրահում տեղի է ունեցել 2008-2009
ուսումնական տարեշրջանի պետական բակալավրիատի քննությունները
գերազանց հանձնած ուսանողների պարգեւատրման հանդիսավոր
արարողությունը: Ինչպես հաղորդում է «Ազդակը», այս տարի
պարգեւատրման են արժանացել Մեսրոպյան վարժարանի երեք ուսանողներ`
Սեւակ Քենդիրը, Միրեյ Սարգիսյանը եւ Սարին Դավիթյանը:
Թերթից տեղեկանում ենք, որ պարգեւատրման հանդիսավոր
արարողությունն սկսվել է Լիբանանի եւ Հայաստանի պետական հիմներով:
Հայկազյան համալսարանի նախագահ Պոլ Հայտոսթյանը շնորհավորելով
ուսանողներին, հղել է նրանց իր պատգամը. «Գերազանց աշակերտները
պատկանում են մի ժողովրդի, որն ունի հոգեկան, պատմական, գենետիկ,
աշխարհագրական բոլոր տվյալները: Կյանքի նպատակը միայն վկայական
ձեռք բերելը չէ, այլ միշտ լավագույնին հասնելու ձգտումը»:
Միջոցառման գեղարվեստական մասում ելույթ են ունեցել
դաշնակահար Վահան Բոյաջյանը եւ ջութակահար Խաժակ Խաչատրյանը: