ԵՐԵՎԱՆ, 30 ՀՈՒԼԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Երեւանի Հանրապետության հրապարակում օգոստոսի 1-ին ժամը 20:30-ին տեղի կունենա համա-ՀՄԸՄ-ական 8-րդ մարզախաղերի բացման հանդիսությունը: Ինչպես տեղեկանում ենք ՀՄԸՄ (Հայ մարմնակրթական ընդհանուր միություն) Կենտրոնական վարչությունից, բացման հանդիսությունը պետք է սկսի մասնակից մարզիկների տողանցքով, որին կհաջորդի պաշտոնական միջոցառում` ներկայությամբ պետական, կրոնական եւ պաշտոնական անձանց: Այնուհետեւ տեղի կունենա հայ երգիչների մասնակցությամբ համերգ: Հայաստանում բացման հանդիսությունը կհեռարձակվի Հայաստանի հանրային հեռուստաընկերության (Հ1-ի) մշակութային «Արարատ» ալիքով ժամը 23:00-ին: Իսկ Սփյուռքում բացման հանդիսությունը կսփռվի համացանցով` Երկիր Մեդիա հեռուստաընկերության www.yerkirmedia.am կայքով, Հայաստանի ժամանակով ժամը 23:00-ին, ինչպես նաեւ Հ1 հեռուստաալիքով, կեսգիշերին:

---