Դագոմիսի միջազգային փառատոնում հաղթանակել է հայկական
երաժշտական կոլեկտիվը
15-07-2009 18:10:00 | Ռուսաստան | Մշակույթ
ԴԱԳՈՄԻՍ, 15 ՀՈՒԼԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Դոնի
Ռոստովի «Բարրակուդա» երաժշտական ինքնագործունեության հայկական
համույթը հաղթանակով է վերադարձել Դագոմիսից (Կրասնոդարի
երկրամաս), որտեղ անցկացվում էր «Բարձր ալիքի վրա» արվեստի
միջազգային փառատոնը: Միջոցառմանը կոլեկտիվներ էին մասնակցում
Ռուսաստանից, Ղազախստանից, Ուկրաինայից, Բելոռուսիայից եւ
Հայաստանից: Ինչպես հաղորդում է Ռուսաստանի հայերի «Երկրամաս»
թերթը, ոճի սահմանափակումներ չեն եղել, նվագել են եւ դասական, եւ
ազգագրական երաժշտություն:
Փառատոնի մեծ մրցանակը նվաճած ռոստովյան կոլեկտիվի
եզակիությունը այն է, որ նրանք համադրում են, ասես, «անհամադրելի»
տարաշխարհիկ գործիքներ` հայկական դուդուկն ու դհոլը, հնդկական
տաբլա թմբուկները, աֆրիկյան ուդու կավե թմբուկները, արաբական
զյարբը, կոնգոն, մարակասիները եւ շատ ուրիշներ: Կոլեկտիվը
ունիվերսալ է եւ աչքի է ընկնում ոճերի եւ մշակույթների
միախառնմամբ: Հենց դա էլ օգնել է դոնյան երաժիշտներին նվաճել մեծ
մրցանակը: