ԵՐԵՔ ՀԱՅ ԵՐԻՏԱՍԱՐԴՆԵՐ ԱՄՌԱՆԸ ԿՄԱՍՆԱԿՑԵն ՋՈՆ ՍՄԻԹԻ
ՀԻՄնԱԴՐԱՄԻ ՀԻՆԳՇԱԲԱԹՅԱ ԴԱՍԸՆԹԱՑՆԵՐԻՆ
17-01-2007 18:50:00 | Հայաստան | Հասարակություն
ԵՐԵՎԱՆ, 17 ՀՈՒՆՎԱՐԻ, ՆՈՅՅԱՆ ՏԱՊԱՆ: Մեծ Բրիտանիայի Ջոն Սմիթի
անվան հիմնադրամի նախաձեռնած հինգշաբաթյա դասընթացների հայաստանյան
մասնակիցների ընտրության նպատակով այցով Երեւանում է գտնվում
հիմնադրամի փոխնախագահ Քեննեթ Մունրոն: Քաղաքական, տեղական
ինքնակառավարման, ինչպես նաեւ հասարակական ոլորտներում ներգրավված
25-35 տարեկան 57 դիմորդներից մրցույթով կընտրվեն 3-ը, որոնք
ամռանը կմեկնեն Անգլիա:
Ինչպես հունվարի 17-ի ասուլիսում հայտնեց Ք.Մունրոն,
հիմնադրամի կողմից կազմակերպվող դասընթացների նպատակն է տարբեր
երկրների երիտասարդներին ծանոթացնել Անգլիայի ժողովրդավարության
համակարգին: Նշվեց, որ դասընթացների մասնակիցները միաժամանակ
հնարավորություն են ունենում աշխատել երկրի մասնավոր եւ պետական
կառույցներում:
Ք.Մունրոն հայտնեց, որ ԱՊՀ երկրներից մինչ օրս ծրագրին
մասնակցել են Հայաստանի, Վրաստանի, Մոլդովայի, Ռուսաստանի եւ
Ուկրաինայի երիտասարդները: Նա նշեց, որ դասընթացներին մասնակցած
հայ երիտասարդները միշտ էլ աչքի են ընկել իրենց բարձր
գիտելիքներով:
Մեծ Բրիտանիայի Աշխատավորական կուսակցության նախկին առաջնորդ
Ջոն Սմիթի անվան հիմնադրամը ստեղծվել է 1995թ.-ին` նրա կնոջ
կողմից: