ԵՐԵՎԱՆ, 11 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Այս տարվա հունվարին Երեւանի երկու փոխանակման կետերի վրա ավազակային հարձակման գործով դեկտեմբերի 11-ի դատական նիստում ցուցմունքներ տվեց ամբաստանյալ Սերգեյ Մովսիսյանը: Նա ընդունեց, որ առաջին փոխանակման կետի վրա հարձակման ժամանակ տեսնելով, որ խմբի անդամ Անդրոնիկ Թորոսյանի եւ փոխանակման կետի աշխատակից Արթուր Մկրտչյանի միջեւ վեճ է բռնկվել, ինքը դանակով հարվածել է վերջինիս: Միաժամանակ նա հերքեց իր նախաքննական ցուցմունքն այն մասին, որ Ա.Մկրտչյանին մի քանի անգամ է հարվածել, եւ որ հարվածի պահին տուժողը պառկած վիճակում է եղել: Ս.Մովսիսյանը, ինչպես նախորդ նիստում հարցաքննված ամբաստանյալ Ա.Թորոսյանը, հերքեց բանդիտիզմի մեղադրանքը: Ըստ նրա, հանցագործությունը նախապես ծրագրավորված չի եղել: Դեկտեմբերի 12-ի նիստում ցուցմունքներ կտա հաջորդ ամբաստանյալը` Կարեն Դավթյանը:

---