ԱՅՍ ՏԱՐՎԱ ԸՆԹԱՑՔՈՒՄ ՀԱԳ-Ի ՁԵՌՔ ԲԵՐԱԾ ՆՈՐ ԳՐԱԿԱՆՈՒԹՅԱՆ ԹԻՎԸ
ԿԿԱԶՄԻ ՄՈՏ 40 ՀԱԶԱՐ ՄԻԱՎՈՐ
06-12-2006 18:20:00 | Հայաստան | Մշակույթ
ԵՐԵՎԱՆ, 6 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի Ազգային
գրադարանի (ՀԱԳ) ֆոնդերի համալրման համար 2006թ.-ին պետբյուջեից
հատկացվել է 28 մլն 62 հազար դրամ (մոտ 66 հազ. ԱՄՆ դոլար), ինչը
6,2%-ով ավելի է 2005թ.-ի ֆինանսավորումից: Ինչպես դեկտեմբերի 6-ի
ասուլիսում հայտնեց ՀԱԳ-ի տնօրեն Դավիթ Սարգսյանը, այս տարվա
ընթացքում գրադարանի ստացած նոր գրականության թիվը կկազմի մոտ 40
հազար միավոր:
Ըստ Դ.Սարգսյանի, «Պարտադիր օրինակի եւ վավերագրերի մասին»
օրենքի ընդունումից հետո հունվար-նոյեմբեր ամիսներին միայն
հայաստանյան հրատարակչությունների կողմից գրադարանին փոխանցվել են
ավելի քան 1625 միավոր նոր անուն գրքեր: Նշվեց, որ նույն
ժամանակահատվածում ՀԱԳ-ը 1207 գրքեր է ստացել արտասահմանից, իսկ
նվիրատվությունների թիվը կազմել է 6311 միավոր: Նվիրատվությունները
հիմնականում ստացվել են ԱՄՆ-ից, Անգլիայից, Իտալիայից,
Հունգարիայից, Եգիպտոսից եւ Իրանից:
Օրերս գրադարանին է փոխանցվել գերմանաբնակ լրագրող Համո
Պետրոսյանի նվիրատվությունը` «Die Grossen» 12 հատորանոց
հանրագիտարանը: Ինչպես նշեց ՀԱԳ-ի տնօրենը, այն Հայաստան է բերել
նախագահ Ռոբերտ Քոչարյանը` Գերմանիա կատարած այցից հետո:
Ըստ Դ.Սարգսյանի, գրադարանի նպատակն է ձեռք բերել տարբեր
երկրներում հայերենով լույս տեսնող գրքեր, մասնավորապես հին
հրատարակության: Նշվեց, որ 2000-2006թթ.-ին արտերկրում ՀԱԳ-ը
այդպիսի 82 անուն գիրք է գնել: Դրանց մեջ կան եւ բնօրինակներ, եւ
լուսապատճենային տարբերակներ: