ՀԱՍՄԻԿ ՊԱՊՅԱՆԸ ՄԻՆՉԵՎ 2009 ԹՎԱԿԱՆԸ ՊԱՅՄԱՆԱԳՐԵՐ ՈՒՆԻ
ԵՎՐՈՊԱԿԱՆ ԵՎ ԱՅԼ ԵՐԿՆԵՐԻ ՀԱՅՏՆԻ ՕՊԵՐԱՅԻՆ ԹԱՏՐՈՆՆԵՐԻ ՀԵՏ
30-11-2006 16:54:00 | Հայաստան | Մշակույթ
ԵՐԵՎԱՆ, 30 ՆՈՅԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Աշխարհի
հայտնի օպերային թատրոնների բեմահարթակներում հանդես եկած եւ
բազում հանդիսատեսներ նվաճած երգչուհի Հասմիկ Պապյանը կրկին
Հայաստանում է. նա հրավիրվել էր մասնակցելու Հանրային
հեռուստատեսության եւ ռադիոյի 50 եւ 80-ամյակներին նվիրված
հոբելյանական համերգին: Այս մասին նոյեմբերի 30-ին «Ուրբաթ»
ակումբում լրագրողների հետ հանդիպման ժամանակ հայտնեց երգչուհին:
Աշխարհահռչակ սոպրանոն մինչեւ 2009 թվականը ներառյալ
պայամանագրեր ունի եվրոպական եւ աշխարհի մյուս մայրցամաքների
հայտնի օպերային թատրոնների հետ: Երեւանյան կարճատեւ դադարից հետո
նա համերգներով հանդես կգա ԱՄՆ-ում, Հարավային Կորեայում:
Ներկայումս աշխարհի գրեթե բոլոր երկրներում վաճառվում է նրա
մասնակցությամբ «Նորմա»-ի DVD սկավառակը: Իսկ Կոմիտասի երգերի
կատարումների վերջերս թողարկված լազերային սկավառակը արժանացել է
«Պիցեկատո» առաջին մրցանակին:
Հասմիկ Պապյանը նշեց, որ իր համար առանձնահատուկ պատիվ է
Ֆրանսիայում Հայաստանի տարվա կապակցությամբ կայանալիք համերգին
մասնակցելը: «Ես այդ առիթով մի հետաքրքիր ծրագիր եմ պատրաստել`
հայկական երգերի ընտրանի` միջնադարյան շարականներից, Կոմիտասյան
երգերից մինչեւ Մանսուրյանի հայրենները: Դա այնպիսի մի ծրագիր է,
որով օտարերկրացիները լիարժեք կպատկերացնեն հայկական երգարվեստը»,-
ընդգծեց երգչուհին:
Հ.Պապյանը իրեն հատուկ համեստությամբ նշեց, որ ինքը չի
կարծում, թե հասել է ամեն ինչի արվեստի այդ ասպարեզում: «Ամեն մի
համերգ ինձ համար առաջինն է: Թեեւ 20 տարի է արդեն բեմում եմ,
սակայն ամեն անգամ մեծ պատասխանատվությամբ եմ բեմ բարձրանում:
Ցանկանում եմ երկար մնալ բեմում եւ կատարել Վագների օպերաներից
մեկը, հատկապես իմ երազած «Տրիստան եւ Իզոլդա»-ից Իզոլդայի
դերերգը»,- ասաց նա:
Նշենք, որ Հասմիկ Պապյանը ներկայումս Նորմայի դերերգի
ամենահայտնի կատարողն է: Նա այդ դերով 172 անգամ հանդես է եկել
աշխարհի լավագույն օպերային թատրոնների բեմերում: