ՀՀ-ՈՒՄ ՄԵԾ ԲՐԻՏԱՆԻԱՅԻ ԴԵՍՊԱՆԱՏՈՒՆԸ ԿՆԵՐԴՆԻ ՄԱՏՆԱՀԵՏՔԵՐԻ
ԳՐԱՆՑՄԱՆ ԸՆԹԱՑԱԿԱՐԳ
24-11-2006 18:45:00 | Հայաստան | Հասարակություն
ԵՐԵՎԱՆ, 24 ՆՈՅԵՄԲԵՐԻ, ՆՈՅՅԱՆ ՏԱՊԱՆ: 2006թ.-ի դեկտեմբերի
1-ից ՀՀ-ում Մեծ Բրիտանիայի դեսպանատունը ներդնելու է բիոմետրիկ
(կենսաչափական) տվյալների` մատնահետքերի, գրանցման ընթացակարգ: Ըստ
դեսպանատնից «ՆՈՅՅԱՆ ՏԱՊԱՆ»-ին տրամադրած հաղորդագրության, այս
նորամուծությունը կատարվում է բիոմետրիկ տվյալներով ինքնության
հաստատման գլոբալ համակարգի ներդրման համատեքստում:
Ընթացակարգը նպատակաուղղված է անձանց ինքնության պաշտպանմանը,
հետագայում Միացյալ Թագավորություն (ՄԹ) մուտք գործելու
հեշտացմանը, եւ թույլ կտա խուսափել մուտքի արտոնագրերի (վիզաների)
կեղծման եւ ՄԹ ներգաղթի ու ապաստարանի տրամադրման համակարգերի
չարաշահման դեպքերից: Դեկտեմբերի 1-ից մուտքի արտոնագրի
հայտատուները, բացառությամբ 5 տարին չլրացած երեխաների,
մատնահետքեր հանձնելու համար պետք է անձամբ ներկայանան
դեսպանատուն:
Մատնահետք հանձնելուց կարող են ազատվել այն անձինք, ովքեր
առողջական պատճառներով չեն կարող մատնահետք տալ, ինչպես նաեւ
դիվանագիտական անձնագրով անձինք եւ նրանց հետ ուղեւորվող խնամառու
անձինք` պաշտոնական այցերի դեպքում, պաշտոնական անձնագրով անձինք`
պաշտոնական կամ կառավարական այցով ՄԹ մեկնելիս, Միավորված Ազգերի
Կազմակերպության (ՄԱԿ) պաշտոնյաները` ՄԱԿ-ի ճանապարհորդական
փաստաթղթերով կազմակերպության պաշտոնական այցերի դեպքում,
Բրիտանական Համագործակցության եւ ՆԱՏՕ-ի զինված ուժերի անդամները,
ՄԹ-ում կացության իրավունքի կնիք-վկայագիր ունեցող անձինք:
Հայտատուներին խնդրվում է նախքան դեպանատուն ներկայանալը
ձեռնպահ մնալ մատների ծայրերը զարդարելուց, հետեւել, որ մատներին
կտրվածքներ, նշաններ կամ դրոշմներ չլինեն, քանի որ նշված
գործոնները կարող են ազդել մատնահետք հանձնելու հնարավորության
վրա: