2007 Թ.-ԻՑ ՄԻՋՆԱԿԱՐԳ ԴՊՐՈՑՆԵՐՈՒՄ ԱՎԱՐՏԱԿԱՆ ՔՆՆՈՒԹՅՈՒՆՆԵՐՆ
ԱՍՏԻՃԱՆԱԲԱՐ ԿԱՆՑԿԱՑՎԵՆ ԿԵՆՏՐՈՆԱՑՎԱԾ ՀԱՄԱԿԱՐԳՈՎ
23-11-2006 19:05:00 | Հայաստան | Հասարակություն
ԵՐԵՎԱՆ, 23 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 23-ի նիստում
ՀՀ կառավարությունը փոփոխություններ է կատարել ՀՀ կառավարության
2005թ. ապրիլի 14-ի նիստի N14 արձանագրության մեջ, որոնցով,
մասնավորապես, սահմանվում է, որ 2007թ.-ից միջնակարգ դպրոցների
շրջանավարտների պետական ավարտական քննություններն աստիճանաբար
կանցկացվեն կենտրոնացված համակարգով: Այս մասին «ՆՈՅՅԱՆ ՏԱՊԱՆ»-ին
հայտնեցին ՀՀ կառավարության Տեղեկատվության եւ հասարակայնության
հետ կապերի վարչությունից:
«Միջնակարգ դպրոցի ավարտական քննություններ» բաժնում
ամրագրվել է, որ նշված քննությունների ցանկում հայոց լեզուն, հայոց
պատմությունը, մաթեմատիկան եւ օտար լեզուն պարտադիր են համարվում
միջնակարգ դպրոցի բոլոր շրջանավարտների համար, իսկ բուհ-երում
կրթությունը շարունակել ցանկացող շրջանավարտները կարող են պարտադիր
ընտրովի առարկայից բացի ընտրել եւս մեկ` նախընտրած մասնագիտությանը
համապատասխանող առարկա:
Որոշմամբ «Հիմնական դպրոցի ավարտական քննություններ» բաժնում
ավելացվել է հայոց պատմություն առարկան: