ԲԱՔՈՒ, 20 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ազգային
հեռուստառադիոխորհրդի (ԱՀՌԽ) ադրբեջանական
հեռուստառադիոընկերությունների հաճախություններով արեւմտյան
ռադիոկայանների ծրագրերի հեռարձակումը դադարեցնելու
անհրաժեշտության մասին որոշումը անօրինական է, «Դեյ.ազին» տված
բացառիկ հարցազրույցում նշել է Մամուլի իրավունքների ինստիտուտի
տնօրեն, իրավագետ Ռաշիդ Հաջիլին:
Ըստ նրա, «Հեռուստառադիոհեռարձակման մասին» օրենքով
հեռուստառադիոընկերություններն իրավունք ունեն վերահեռարձակելու
արտասահմանյան ալիքները: Անհասկանալի է մնում միայն «Ազատություն»,
Բի Բի Սի եւ «Ամերիկայի ձայն» ռադիոկայաններին վերաբերող արգելքի
մասին ԱՀՌԽ որոշումը, մինչդեռ երկրում գործում են եւ այլ
արտասահմանյան ռադիոկայաններ:
Իրավագետի կարծիքով, ԱՀՌԽ որոշումը քաղաքական բնույթ ունի,
քանի որ այդ ռադիոկայանները հեռարձակում են հիմնականում
ադրբեջաներեն եւ նրանց ծրագրերն ավելի շատ քաղաքական
ուղղվածություն ունեն:
Վերջին ժամանակներս հստակ նկատվում է, որ ANS
հեռուստառադիոընկերության վրա ճնշում է գործադրվում: Մի կողմից
ԱՀՌԽ-ն չի ցանկանում երկարացնել այդ ալիքի լիցենզիան, մյուս
կողմից` անվերջ հարկային ստուգումներ են: Ռ.Հաջիլին այստեղ էլ չի
բացառում այդ ճնշման քաղաքական պատճառները:
Վերջին իրադարձությունները ցույց են տալիս, որ Ադրբեջանում
նորից ուժեղացել է ճնշումը ԶԼՄ-ների վրա, որը, Ռ.Հաջիլիի կարծիքով,
կապված է հասարակության մեջ ԶԼՄ-ների աճող դերակատարության հետ:
«Ես չեմ կարծում, որ միջազգային կազմակերպությունները անտարբեր
կմնան Ադրբեջանում խոսքի ազատության վատթարացման նկատմամբ: Եվ
ԶԼՄ-ների շուրջ նման իրավիճակի շարունակումը կարող է վնաս հասցնել
մեր երկրի հեղինակությանը»,- նկատել է իրավագետը: