ՎՐԱՑԻ ԽՈՐՀՐԴԱՐԱՆԱԿԱՆԸ ԴԱՏԻ ԿՏԱ ԱՅՆ ԼՐԱԳՐՈՂՆԵՐԻՆ, ՈՎՔԵՐ
ԿՕԳՏԱԳՈՐԾԵՆ «ՀԱՐԱՎԱՅԻՆ ՕՍԵԹԻԱ» ՏԵՐՄԻՆԸ
22-09-2006 18:35:00 | Վրաստան | Միջազգային
ԹԲԻԼԻՍԻ, 22 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Վրաց խորհրդարանի
պատգամավոր Գուրամ Վախթանգիշվիլին մտադիր է դատի տալ այն
լրագրողներին եւ պաշտոնական անձանց, որոնք օգտագործում են
«Հարավային Օսեթիա» կամ «Հարավային Օսեթիայի նախագահ» տերմինը:
Ինչպես «Ախալի թաոբա»-ին հայտարարել է պատգամավորը, այդ տերմինի
կիրառումը Վրաստանի Սահմանադրության կոպիտ խախտում է: «1991
թվականին Հարավային Օսեթիայի ինքնավար օկրուգը լուծարվել է անկախ
Վրաստանի իշխանությունների կողմից եւ սկսել է կոչվել Շիդա Քարթլիի
շրջան (Սամաճաբլո): Խորհրդարանականն ընդգծել է, որ այս տերմինը
նյարդայնացնում է հակամարտության գոտում ապրող վրացիներին,
մասնավորապես Լիախվայի մեծ եւ փոքր կիրճերի բնակիչներին: Այն
տարածքի 50%-ը, որը սովետական տարիներին կոչվում էր Հարավային
Օսեթիա, վերահսկում է պաշտոնական Թբիլիսին եւ նրա վրա տարածվում է
Վրաստանի իրավասությունը»,- հայտարարել է Վախթանգաշվիլին: