ՄԻՇԵԼ ՊԼԱՏԻՆԻՆ ԱՆՉԱՓ ՏՊԱՎՈՐՎԱԾ Է ՖՈՒՏԲՈԼԻ ՆԿԱՏՄԱՄԲ ՀԱՅԵՐԻ
ՎԵՐԱԲԵՐՄՈՒՆՔՈՎ
03-08-2006 15:20:00 | Հայաստան | Սպորտ
ԵՐԵՎԱՆ, 3 ՕԳՈՍՏՈՍԻ, ՆՈՅՅԱՆ ՏԱՊԱՆ: Լինելով ՖԻՖԱ-ի եւ ՈԻԵՖԱ-ի
գործադիր կոմիտեի անդամ, զբաղեցնելով մի շարք պատասխանատու
պաշտոններ այդ կառույցների ծրագրերում, Միշել Պլատինին մեծ ավանդ
ունի աշխարհում, այդ թվում` Հայաստանում ֆուտբոլի զարգացման
գործում: Այս մասին հուլիսի 3-ին` ընդունելով Ֆրանսիայի Ֆուտբոլի
Ֆեդերացիայի փոխնախագահ, ՖԻՖԱ-ի եւ ՈՒԵՖԱ-ի գործադիր կոմիտեի անդամ
Միշել Պլատինիին, հայտարարել է ՀՀ վարչապետ Անդրանիկ Մարգարյանը:
Նա նշել է, Մ.Պլատինին մեծապես նպաստել է հայկական ֆուտբոլի համար
բոլոր օգտակար ձեռնարկումների իրագործմանը:
Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ կառավարության
Տեղեկատվության եւ հասարակայնության հետ կապերի վարչությունից, ՀՀ
վարչապետը կարեւորել է պատվիրակության այցը հատկապես այս
ընթացքում, երբ Հայաստանը մեծ շուքով պատրաստվում է Ֆրանսիայում
Հայաստանի օրերին:
Անդրադառնալով Հայաստանում ֆուտբոլի զարգացման եւ
ներդրումային ծրագրերի իրագործմանը, Ա.Մարգարյանը նշել է հատկապես
ՖԻՖԱ-ի «Գոլ» ծրագիրը, ՈՒԵՖԱ-ի «Հեթ տրիկ», նաեւ «Փոքր դաշտերի»
ծրագրերը, որոնց իրագործումը Հայաստանի ֆուտբոլի ֆեդերացիայի
կողմից ընթանում է մեծ թափով եւ զգալի խանդավառություն ու
հետաքրքրություն է առաջացրել Հայաստանի բոլոր մարզերում եւ
համայնքերում: Դրանք, ըստ Ա.Մարգարյանի, կարեւոր են այնքանով, որ
անցած տարիներին մարզական ենթակառուցվածքների վիճակի վատթարացումից
հետո առաջին ծավալուն աշխատանքներն են. արդեն ավելի քան 15 այդպիսի
դաշտեր են բացվել, եւ դրանց թիվը հասնելու է 40-ի: ՀՀ վարչապետը
ողջունելի է համարել այնպիսի որոշումների ընդունումը ՖԻՖԱ-ի եւ
ՈԻԵՖԱ-ի կողմից, որոնք նպաստում են հենց զարգացող երկրներում
ֆուտբոլի առաջընթացին, որովհետեւ ֆուտբոլային տերություններն այդ
նույն խնդիրներն այլեւս չունեն:
Մ.Պլատինին նշել է, որ առաջին անգամ լինելով Հայաստանում,
անչափ տպավորված է ֆուտբոլի նկատմամբ հայերի վերաբերմունքով: «Երեկ
փոքր դաշտերի բացման ժամանակ տեսանք, թե որքան եռանդ ու սեր կա
երեխաների մեջ ֆուտբոլի նկատմամբ, եւ ինչպիսի ջանասիրությամբ են
նրանք զբաղվում այդ սպորտաձեւով: Դա խոստումնալից է»,- ասել է
Մ.Պլատինին` իր խոսքում հիշատակելով նաեւ ֆրանսիական ֆուտբոլի
զարգացմանն իրենց նպաստը բերած հայազգի մի շարք ֆուտբոլիստների:
Հանդիպման ավարտին, որին մասնակցել են նաեւ Ֆրանսիայի
ֆուտբոլի Ֆեդերացիայի գլխավոր տնօրենի տեղակալ Ժան-Լուի Վալենտինը
եւ ՀՖՖ-ի նախագահ Ռուբեն Հայրապետյանը, երկուստեք
պատրաստակամություն է հայտնվել այսուհետ եւս հնարավորության
սահմաններում աջակցել հայկական ֆուտբոլի զարգացմանը: