ՁԵՐԲԱԿԱԼՎԵԼ ԵՆ ՎՐԱՍՏԱՆԻ ԵՐԿՈՒ ՔԱՂԱՔԱՑԻՆԵՐ, ՈՐՈՆՔ ԿԱՍԿԱԾՎՈՒՄ
ԵՆ ՄԻԼԻՑԻՈՆԵՐՆԵՐԻ ՍՊԱՆՈՒԹՅԱՆ ՄԵՋ
08-06-2006 15:00:00 | Ռուսաստան | Միջազգային
ՄՈՍԿՎԱ, 8 ՀՈՒՆԻՍԻ, ՆՈՅՅԱՆ ՏԱՊԱՆ: Մոսկվայի դատախազությունը
հաղորդել է երկու քաղաքացիների ձերբակալության մասին, որոնք
կասկածվում են Ռուսաստանի մայրաքաղաքի միլիցիայի երկու
աշխատակիցների սպանության մեջ:
Քննչական գործողությունների եւ օպերատիվ-հետախուզական
միջոցառումների արդյունքում ձերբակալվել է Վրաստանի քաղաքացի Դավիթ
Զվիադաձեն: Քննիչների հավաքած ապացույցների հիման վրա նրան
մեղադրանք է ներկայացվել ՌԴ ՔՕ-ի 105-րդ հոդվածի 2-րդ մասով եւ
162-րդ հոդվածի 3-րդ մասով («հանցակցություն սպանության եւ
ավազակության),- ասվում է Մոսկվայի դատախազության մամլո
ծառայության հաղորդման մեջ: Մամլո տեղեկագրում նշվում է, որ
դատարանի որոշմամբ Զվիադաձեն ձերբակալված է:
Դատախազության տվյալներով, երկրորդ կասկածյալը` Վրաստանի
քաղաքացի Թեյմուրազ Գոգնաձեն ձերբակալվել է Վրաստանի իրավապահ
մարմինների կողմից: Ներկայումս լուծվում է նրա էքստրադիցիայի
հարցը:
Դրանից բացի, միջազգային հետախուզում է հայտարարվել այդ
հանցագործությանը մեղսակցության մեջ եւս հինգ կասկածվողների
նկատմամբ: Հեռակա կարգով նրանց խափանման միջոց է ընտրվել կալանքը,-
հայտնել են մամլո ծառայությունից:
Հիշեցնենք, որ միլիցիոներները սպանվել էին Մոսկվայում այս
տարվա ապրիլի 28-ին Կիրովոգրադսկայա փողոցի բնակարաններից մեկում
կողոպտիչներին ձերբակալելու փորձի ժամանակ: Հանցագործները
գնդակահարել էին միլիցիոներներին եւ գողանալով 200 հազար ռուբլի եւ
ոսկե զարդեր` փախել: