ՄՈՍԿՎԱ, 6 ՀՈՒՆԻՍԻ, ՆՈՅՅԱՆ ՏԱՊԱՆ: Ռուսաստանցիները
Բելոռուսիային համարում են Ռուսաստանին ամենաբարեկամ պետությունը,
իսկ Լատվիային` թշնամաբար տրամադրված երկիր: Այսպիսի տվյալներ է
բերում Լեւադայի կենտրոնը` ըստ աշխարհի երկրների հանդեպ Ռուսաստանի
բնակիչների վերաբերմունքը որոշելու նպատակով անցկացված ամենամյա
հարցման արդյունքների: Այսպես, ռեսպոնդենտների 47%-ը վստահ է, որ
Ռուսաստանը եւ Բելոռուսիան բարեկամական երկրներ են, իսկ 46%-ը
Լատվիային համարում է ոչ բարեկամական, թշնամական պետություն:
Ռուսաստանի «բարեկամների» տասնյակը, ըստ հարցման
արդյունքների, հետեւյալ դասավորությունն ունի. Բելոռուսիա` 47%,
Ղազախստան` 33%, Չինաստան` 24%, Գերմանիա` 22%, Հնդկաստան` 15%,
Հայաստան` 14%, Բուլղարիա` 10%, Ուկրաինա` 10%, Ֆրանսիա` 8%,
Իտալիա` 7%:
Ռուսաստանի «թշնամիների» տասնյակի մեջ մտնում են. Լատվիան`
46%, Վրաստանը` 44%, Լիտվան` 42%, ԱՄՆ-ը` 37%, Էստոնիան` 28%,
Ուկրաինան` 27%, Աֆղանստանը` 12%, Իրաքը` 9%, Մոլդավիան` 9%,
Լեհաստանը` 7%:
Եթե համեմատենք այս տվյալները անցած տարվա հարցման տվյալների
հետ, ապա Ղազախստանի հանդեպ բարեկամական վերաբերմունքը
ռուսաստանցիների շրջանում ավելացել է 13%-ով, Չինաստանի` 12%,
Հայաստանի նկատմամբ` 5%-ով: Վրաստանը էլ ավելի է ամրապնդվել
«թշնամիների» ցուցակում, մեկ տարում կորցնելով ռուսաստանցիների
վստահության քվեն 6%-ով: ԱՄՆ-ը վատթարացրել է իր վարկանիշը
միանգամից 14%-ով: Հատկանշական է, որ Ուկրաինան մտնում է ինչպես
«բարեկամների» երկրորդ հնգյակում, այնպես էլ թշնամիների երկրորդ
հնգյակում: