ԲԱՔՈՒ, 30 ՄԱՅԻՍԻ, ՆՈՅՅԱՆ ՏԱՊԱՆ: Ադրբեջանի խորհրդարանը մայիսի 30-ի նիստում վավերացրել է Վրաստանի ռուսական ռազմական բազաներից բեռների տարանցման մասին Ռուսաստանի հետ ձեռք բերված երկկողմ պայմանավորվածությունը, որին նախորդել էր երկու երկրների միջեւ ապրիլի 21-ին Մոսկվայում կայացած պաշտոնական նոտաների փոխանակումը: Պայմանավորվածությունների համաձայն, որոշարկված են, մասնավորապես, ռուսական ռազմական բեռների փոխադրումների ծավալները եւ Ադրբեջանի երկաթուղով դրանց անցնելու հաճախականությունը 2006 թվականին: Կողմերի պայմանավորվածությամբ, ռուսական ռազմական բեռների տարանցման ծավալները առաջիկա երկու տարիների համար համաձայնեցնելու են Ադրբեջանի եւ Ռուսաստանի պաշտպանության նախարարությունները: Այս մասին հաղորդում է ԻՏԱՌ-ՏԱՍՍ-ը:

---